– Биыл облыс бойынша 4 270 бала мектеп табалдырығын алғаш рет аттады. Соның 3 468-і – қазақ, қалған – 802-сі орыс сыныптарына барды, – дейді облыстық білім басқармасы басшысының орынбасары М.Төребеков.
Сәтбаев қаласындағы №14 мектепте өткен жылы алғаш рет қазақ сыныбы ашылған еді. Қай нәрсені болса да бастау қиын емес пе? Сол сыныпқа небәрі 6 оқушы жиналған еді. Қазір олар екінші сыныпта оқып жүр. Бір қызығы, сол алтаудың екеуі – өзге ұлт өкілдері болатын. Ал биылғы жағдай қалай болды екен?
– Биыл мектебімізде 2 қазақ, 2 орыс тілді 4 бірінші сынып ашылды. Қазақ сыныптарына – 39, орысшаға – 57 бала жиналды. Бізді балаларын қазақша оқытқысы келетін ата-аналар қатарының молая түскені қуантады, –дейді мектеп директоры Фарида Сыздықова.
Әрине, бұл қуанышты жағдай. Дегенмен Сәтбаев қаласы бойынша биылғы орыс мектебінің табалдырығын алғаш аттаған 320 баланың 114-нің қазақ баласы екенін білгенде көңіл жабырқап-ақ қалады. Демек ұлттық сана сілкінісін күшейте түспесе болмайды-ау...
Ұлытау облысы
