Тосын кәсіп бастаған кәсіпкер кешегі пандемияға дейін сырттан есік тасып, саудалапты. Шекаралар шегенделіп, өзге елдермен байланыс үзілген тұста қарап отырмай құрылысты бастап кеткен. Артынша өндірістік базаға газ жеткізіп, жарық тартуға көшті. Қытайдан күткен құрылғысы індетке байланысты тарс бекіген кеденнен кедергісіз өткенде тәуекел мен талабы ізсіз кетпейтініне қуанды. Осылайша, 2020 жылы жаңа өндіріс жұмысын бастады. Кәсіпорынға мемлекет қолдауы қанат бітірді. «Даму» қоры арқылы берілген жеңілдетілген несие тың өндірісті өрістете түсті.
Қай істің де оңайы жоқ. Соның ішінде, есік жасау – күрделі кәсіп. Темірді пісіріп, лазерде пішіп, екі жағын қайырудан басталған тірлік бір-бірімен жалғасып, кем дегенде 15 адамның қолынан өтеді. Үйіңізге целлофанмен қапталып, жып-жылтыр күйінде жету үшін талайлар осылай тер төгеді.
«Шетелден маман шақырған жоқпыз. Қытайдан талшықты лазер қондырғысы жеткен соң, бұрыннан темірден қақпа, есік жасап жүрген жергілікті жігіттерді жұмысқа шақырдым. Технологияны игеріп, тәжірибе жинаған жігіттер жасаған есік қазір еліміздің бірнеше қаласына барады», дейді кәсіпкер.
Өндірісті бастар алдында шетелдердегі зауыттарда болып, тәжірибесін зерттеп көрді. Ресейдегі Йошкар-Ола темір есіктерімен танымал болса, сол мемлекеттегі Ковров қаласының бренді – ағаш есік. Қытайда да әр кәсіпке бейімделген шаһар көп. Соның ішінде Гуанчжоуда көргені көкейіне қона кетті.
Кәсіпкер өз ісіне қатысты түрлі мемлекеттегі іс-шаралардан қалмайды. Сөйтіп, кәсіпті дамытып, істі ілгерілетудің амалын іздейді. Қытай сауда
және экономикалық ынтымақтастығын ілгерілетуге бағытталған Кантон көрмесіне барған бір сапарында тапқан олжасы – талшықты лазер. Мүмкіндігі көп құрылғы арқасында қазір ісі алға басып тұр.
Осындай есік шығаратын кәсіпорын Алматы қаласында да бар екен. Ал жылына 400–500 есік шығаратын Қызылордадағы цех өнімдері Астана, Алматы, Түркістан, Шымкент, Тараз бен Ақтау қалаларына жіберіліп жатыр. Өндіріс орны үйдің ішкі есіктерін де шығарады. Осы күні қалада көптеп салынып жатқан тұрғын үй мен ғимараттардағы есіктер – осы цехтың өнімдері.
«Бұрынғыдай сырттан әкеліп, саудалап жүре беруіме де болар еді. Бірақ өзің өндіргеннің орны бөлек. Өндіріссіз экономика алға баспақ емес. Сондықтан белді буып, осы іске кірістік. Қазір цехта 25 адам еңбек етеді. Өзіміздегі шыны зауытынан шыққан әйнекті өңдеп, түсін өзгертіп, жиһаздарға қолданып жатырмыз», дейді Дәулет Пірімжанов.
Қазір шикізаттың көбі сырттан келеді. Ол өзімізден табылса, өндірістегілердің бейнеті біраз азая түсер еді.
Қызылорда
