Суреттерді түсірген – Ерлан ОМАР, «EQ»
Демек көкпардың тарихы терең. Сондықтан да бұл сайыс түрі көшпелілер ойынына еніп отыр. Бұл жолғы дүбірлі жарысқа 9 елдің командасы қатысып, қазіргі таңда «Қазанат» атшабарында іріктеу ойындарын өткізіп жатыр.
9 қыркүйек күні алаңға шыққан қос команда Қазақстан және Өзбекстан құрамасы болды. Аталған ойында Қазақстан құрамасының капитаны Құрманбек Тұрғанбек ойынның екінші минутында есеп ашты. Осылай сайыс тізгіні біздің жігіттердің қолына көшті. Екі таймға созылған дода кезінде Құрманбек Тұрғанбек төрт, Абылайхан Нышанбеков пен Ернар Жарылқасын әрқайсысы үш-үштен, Ернат Мәлімбай мен Ұлан Байтөреев әрбірі екі-екіден, Бақытжан Әзімбай, Арман Жамалбек, Әділет Мамыт үшеуі бір-бір дүркін салым салып, нәтижесінде еліміздің құрамасы 16:0 есебімен айқын жеңіске жетті.
Келесі ойын Ресей және Қытай құрамасы арасында өтті. Шындығында екеуі де ортанқол көкпаршылардан құралған екен. Ойынның алтыншы минутында ресейлік Қалыбек Солтобаев есеп ашып, алғашқы тайм 2:0 есебімен ресейлік шабандоздар пайдасына шешілді. Екінші таймда қытайлық қандастарымыз да бір салымға қол жеткізді. Есеп 4:1. Ресей құрамасы – жеңімпаз.
Іріктеу кезеңді ірі жеңіспен бастаған құраманың бірі – айырқалпақты ағайындар. Олар Моңғолия елінің атынан өнер көрсетуге келген байөлкелік қазақтарды 16:0 есебімен тізе бүктірді. Осы нәтижеге қарап-ақ қырғыз ағайындардың қаншалықты дайындықпен келгенін аңғаруға болатын сияқты.
Төртінші жұп болып алаңға шыққан қарт құрлықтан келген қос команда Мажарстан мен Түркия көкпаршылары тым сылбыр ойнады. Алғашқы таймда есеп ашылмады. Екінші айналымда 7-нөмірде өнер көрсеткен түркиялық шабандоз Başaran Çağlar есеп ашты. Нәтиже 1:0. Бір қызығы, бұл көрсеткіш ойын соңына дейін өзгерген жоқ.
Жарыстың келесі күні алғашқы сайыс Қазақстан мен АҚШ көкпаршылары арасында басталды. Ойынның бірінші минутында еліміздің көкпаршысы Абылайхан Нышанбеков салым салып үлгерді. Қанша айтқанмен қонақжай халықпыз емес пе, біздің ұландар мұхит асып келген ковбойларға ілтипат көрсетіп, салым салуға мүмкіндік туғызды. Сөйтіп, алғашқы тайм 5:3 есебімен аяқталды.
Бір күн бұрын көк бөрү ойынында қырғыздардан 18:0 есебімен ұтылған АҚШ жігіттеріне бұл бір жабырқаған көңіліне құт қонғандай әсер берді. Бірақ екінші таймда бел шешіп ойнаған бас бапкер Нұрдәулет Момыновтың жігіттері 12:4 есебімен ойынға нүкте қойды.
Екінші болып алаңға шыққан Қырғызстан және Түркия құрамасы болды. Көкпар мамандарының сөзіне сенсек, түркиялықтар алғашқы таймда жанын салып ойнады. Тіпті басқаны қырына ілмейтін қырғыздардың шеңберіне түрік шабандозы Демиркөл Иса бір рет салым салды. Бірақ соңғы нәтиже 15:1 есебімен қырғыз бауырлардың үлесінде.
