Тізгінді алғаш боп талай талантты түлеткен Тұрар Рысқұлов ауданы қолға алды. Құлан ауылында орналасқан орталық саябақ адам танымастай өзгерген. Кезінде қоқыс шашылып жататын аймақ жергілікті атқарушы биліктің ықпалымен уақыт талабына сай жаңғырыпты. Бір сөзбен айтқанда, тоз-тозы шыққан саябақ жанға жайлы саялы мекенге айналған.
Мұнда ұйымдастырылған ауылшаруашылық өнімдерінің жәрмеңкесі, спорттық ойындардан өткен түрлі жарыстар көпшіліктің көңілінен шықты. Сондай-ақ түрлі бағыттағы тақырыптық көрмелерді қызыға тамашалаушылардың да қарасы көп болды.
Туған жерге ат басын бұрған өнер жұлдыздары композитор Гүлнұр Өмірбаева, әншілер Досымжан Таңатаров пен «Жігер» тобының жігіттері, өзге әншілер қатысқан концерттік бағдарлама да сәтті ұйымдастырылды.
Есімі елге белгілі театр және кино актерлері Бақытжан Әлпейісов, Жандарбек Садырбаев, Жалғас Толғанбай бастаған өнер саңлақтарының естеліктері де жергілікті тұрғындарды қызықтырғаны анық. Қысқасы, дәстүр мен салт дәріптелген іс-шара көпшіліктің көңілін сергітті.
Бұл күні Ақыртөбе ауылында «Ауыл ел – бесігі» жобасы аясында бой көтерген 140 орындық мәдениет үйі пайдалануға берілді. 100-ден аса тұрғын жиналған іс-шарада ауыл тарихы таныстырылып, ретро әндер шырқалды.
Кейіннен «Мәдениет – асыл қазынам» тақырыбындағы мәдени іс-шара шежірелі Шу ауданында өткізілді. Оған ауданнан шыққан белгілі өнер саңлақтары қатысты.
Жамбыл облысы
