Сурет: qazscience.gov.kz
Орталықтың ашылуы биыл қыркүйек айында Қазақстан мен Германия арасындағы ғылыми байланыстарды нығайтудағы маңызды кезең – Федералдық канцлер Олаф Шольцтің елімізге мемлекеттік сапары аясында жоспарланған еді.
Орталықтың негізгі мақсаты – екіжақты ғылыми ынтымақтастыққа жәрдемдесу. Орталықты озық білім мен заманауи тәжірибе алаңына айналдыруды жоспарлаған тараптар, әсіресе экология, агробиология, білім беру және азаматтық қоғам сияқты негізгі салалардағы зерттеулерді дамытуға мүмкіндік беретін ғылыми әріптестікті өрістетпек.
«Идеядан – әрекетке» ұстанымындағы қазақ-неміс ғылыми-зерттеу ынтымақтастық орталығының тұсаукесері аясында дөңгелек үстел өтті. Алқалы жиынды Ұлттық ғылым академиясының президенті Ақылбек Күрішбаев ашып, орталықты құрудың екі ел арасындағы ғылыми ынтымақтастықты нығайтудағы маңызына тоқталды.
– Неміс ғалымдары және білім мекемелерімен бірлескен жұмысымыз еліміздің әлемдік аренадағы ғылыми ұстанымын нығайтып қана қоймай, жаңа технология мен инновацияларды дамытуға алғышарт боларына сенімдімін. Алдағы келешекте орталық – климаттық өзгерістерді, су ресурстарын және тұрақты даму мақсаттарын зерттеуге бағытталған жобаларды үйлестіруге маңызды алаң болатыны сөзсіз. Мұнда жас зерттеушілерді қолдауға ерекше көңіл бөліп, ғылыми-зерттеу саласындағы озық тәжірибелерді игереміз, – деді ҰҒА президенті.
Қазақ-неміс университетінің президенті, профессор, доктор Волрад Роммель жаңа орталықтың негізгі мақсаты мен міндетін таныстырып, маман даярлау және бірлескен ғылыми жобаларды қолдау саласындағы рөлін атап өтті. Өз кезегінде ҰҒА вице-президенті, профессор Ляззат Ералиева орталықтың тек ғылыми интеграцияға ғана емес, сонымен қатар қос ел арасындағы мәдени алмасуға да ықпал ететінін жеткізді.
Іс-шарада Германия академиялық алмасу қызметінің (DAAD) бас хатшысы, доктор Кай Зикс пен Германия Федеративтік Республикасының еліміздегі елшісі Моника Иверсен жаңа орталық аясында ынтымақтастықты қолдауға және дамытуға дайын екенін білдірді. Сонымен қатар Германия Федеративтік Республикасының Алматыдағы Бас консулы Матиас Кислер және Конрад Аденауэр қорының еліміздегі өкілдігінің басшысы Йоханнес Д.Рей сөз сөйлеп, ғылыми жобаларды одан әрі дамытудағы ұсынысын айтып, ғылымда үлкен табысқа ие болудағы әлем елдері қол жеткізген халықаралық ынтымақтастық нәтижелерін тілге тиек етті.
Дөңгелек үстел мәжілісі барысында физика-математика ғылымдарының докторы, профессор Асқар Жұмаділдаев, Ш. Есенов атындағы Каспий технологиялар және инжиниринг университетінің президенті Берік Ахметов, Д. Серікбаев атындағы Шығыс Қазақстан техникалық университетінің ректоры Сәуле Рахметуллина, DKU халықаралық және аймақтық ынтымақтастық ғылыми-зерттеу институтының директоры Болат Сұлтанов, Қазақстан ұлттық аграрлық зерттеу университеті ректорының бірінші орынбасары Пірімқұл Ибрагимов екі жақты ғылыми ынтымақтастыққа қолдау білдіріп, еліміздегі ғылыми-зерттеу жобалары туралы ой-пікірлерін айтты.
АЛМАТЫ
