Ғылым және жоғары білім министрлігінің хабарлауынша, форумға қатысқан делегация құрамында қазақстандық техникалық университеттердің өкілдері, сондай-ақ «Қазмұнайгаз» компаниясы мен «Kazservice» Қазақстан мұнай сервистік компаниялары одағының өкілдері де бар. Жиынға Ресейдің 60-тан аса аймағынан және Қазақстан, Беларусь, Өзбекстан, Египет, Кувейт және Сауд Арабиясынан келген 800-ден астам компания өкілдері мен 12 мыңнан көп адам қатысты.
TNF форумы – отын-энергетика кешенінің өзекті мәселелерін талқылауға арналған ең ірі алаңдардың бірі. Бұл іс-шара жыл сайын өнеркәсіпшілерді, жер қойнауын пайдаланушыларды, құрылысшыларды, мемлекеттік қызметкерлер мен сарапшыларды жинайды. Биылғы форумға «Технологиялық тұрақтылық: даму стратегиясы» тақырыбы арқау болған.
Форум барысында Ғылым және жоғары білім министрінің орынбасары Талғат Ешенқұлов Түмен облысы губернаторының орынбасары Андрей Райдермен кездесті. Кездесу барысында Қазақстан мен Ресейдің жоғары білім саласындағы ынтымақтастығы талқыланды. Іс-шарада ғылым мен жоғары білімді дамытудың жаңа бағыттарын ескере отырып, техникалық университеттер арасындағы өзара әрекеттестіктің тиімді үлгілері туралы ойлар да ортаға салынды.
Т.Ешенқұлов түмендік жастарды Қазақстанның жоғары оқу орындарында, оның ішінде академиялық ұтқырлық бағдарламасы аясында білім алуға шақырды. Қазақстандық делегацияны ресми қабылдау кезінде Түмен облысының губернаторы Александр Моор отын-энергетика кешенін дамыту үшін ынтымақтастық пен ұзақмерзімді жобаларды іске асыруда жаңа технологиялық шешімдер мен серіктестердің қажет екенін атап өтті. Форум қатысушыларына сессиялар мен мұнай-газ саласындағы технологиялар мен процестер бойынша дөңгелек үстелдер ұйымдастырылды.
