Сурет: ru.freepik.com
Бұл ретте Мемлекеттік қызмет істері агенттігі мен оның аумақтық бөлімшелерінің қызметінің басым бағыттарының біріне мемлекеттік қызметшілердің құқығын қорғау жатады. Осы бағытта агенттіктің Ақтөбе облысы бойынша департаментімен бірге бірқатар талдау жүргізілді. Соның біріне тоқталсақ, мемлекеттік қызметшілерге еңбек демалысын беру мен іссапар шығындарын төлеу мәселелеріне жүргізілген талдау нәтижесінде өңірдегі мемлекеттік органдардың 29 мемлекеттік қызметшісінің құқығы бұзылған. Дәлірек айтқанда, департамент жүргізген талдауға сүйенсек, мемлекеттік органдар тарапынан мемлекеттік қызметшілерге іссапар шығындары заңнамада бекітілген мөлшерге сәйкес толық төленбегені анықталды. Осы талдау нәтижелері Ақтөбе облысындағы әдеп жөніндегі кеңесте қаралып, сондағы шешіммен мемлекеттік қызметшілерге тиесілі төлем өтелді.
Cонымен қатар жұмыс уақыты режімінің сақталуына қатысты жүргізілген талдау нәтижесінде 121 мемлекеттік қызметшіге үстеме жұмыс атқарғаны үшін тынығу сағаттары беру жөнінде шешім қабылданды.
Бұған қоса мемлекеттік қызметшілердің құқықтарын қорғаудың бір құралы – икемді жұмыс кестесін және қашықтан жұмыс істеу мүмкіндіктерін қолдану. Атап айтқанда, бұл жұмыс берушінің келісімі бойынша қызметкерге жұмыс күнінің басқа тәртібі белгіленуі мүмкін. Яғни мемлекеттік қызметшілер аталған режімді белгілеу туралы өтінішпен жүгінуге құқылы. Мысалы, баланы таңертең мен кешке балабақшадан немесе мектептен алып кету сияқты себептер көрсетіледі. Осылайша, бұл мүмкіндікті биылдан бастап 21 мемлекеттік органның 52 мемлекеттік қызметшісі пайдаланып жатыр.
Аталған бағыттағы жұмыстарды нәтижелі жүзеге асыру айрықша маңызды. Өйткені осынау шаралар арқылы мемлекеттік қызметшілер арасында заң үстемдігі сезіліп, мемлекеттік қызметке сенімін нығайтуға мүмкіндік береді.
Мемлекеттік қызметшілердің құқықтары мен заңды мүдделері бұзылған жағдайларда оларды қорғауға және қалпына келтіруге бағытталған шараларды қабылдайтын Әдеп жөніндегі уәкіл институты бар. Жоғарыда айтылғандай бұзушылықтардың алдын алу мақсатында жұмыстар жүргізу үшін аталған кеңеспен бірге өңірдегі Әдеп жөніндегі уәкілдерге ұсыныстар айтылып, тиісті тапсырмалар беріледі.
Айбек ШІЛМАНОВ,
Мемлекеттік қызмет істері агенттігі Ақтөбе облысы бойынша департаментінің басшысы, Әдеп жөніндегі кеңес төрағасы
