Ұлттық музейдің 10 жылдық мерейтойы мен «Күміс жас» жобасы аясында музей ісі ардагерлерінің қатысуымен Қарттар күніне арналған «Қарттарым – асыл қазынам» атты салтанатты іс-шара өтті. Оған «Қамқор отбасы», «Шаңырақ» қарттар үйлері, «Белсенді ұзақ өмір сүру» орталықтарынан зейнет жасындағы қариялар қатысты.
Мереке қарсаңында тұсауы кесіліп отырған «Күміс жас» жобасы еліміздің тарихи-мәдени мұрасын насихаттап, зейнеткерлерге жан-жақты қолдау көрсету, бос уақыттарын пайдалы, тиімді өткізуге, қызықты шаралар ұйымдастыруға бағытталып отыр.
Ұлттық музейдің ғылыми хатшысы Саялбек Ғиззатов қонақтарды төл мерекесімен құттықтап, «Күміс жас» жобасын аға буын мен жас ұрпақ арасындағы алтын көпір дей келе, игі бастамаға сәттілік тіледі.
– Бүгінгі айтулы іс-шарамен қатар Ұлттық музейге 10 жыл толды. Басқосудың тағы бір себебі, «Күміс жас» жаңа жобасының тұсаукесеріне куә болып отырмыз. Іргелі жобаның басты мақсаты, өзіміздің зейнетке шыққан ардагерлерімізге, олардың басын қосып саламатты өмір салтын ұстануға, музейдің шығармашылық әлеуетін одан әрі дамытуға атсалысу екенін айта кеткен жөн. Жоба аға буын мен жас ұрпақтың арасындағы алтын көпір іспеттес болғалы тұр. Атақты француз жазушысы Андре Моруа «Батылдық, еркіндік өлгенде, қарттық дүниеге келеді» деген екен. Сіздер батыл, еркін басып жүре беріңіздер, жас ұрпақ соңдарыңыздан ере берсін», – деді ол.
Мұнан соң іс-шараға келген құрметті қонақ, музей майталманы Сахан Асайынқызы сөз сөйлеп, музей қызметкерлерінің сый-құрметіне алғысын білдірді.
– Он жыл бұрын осы музейдің шаңырағын көтереміз деп бәріміз атсалысқан болатынбыз. Сол жылдардан бері ұлттық бірегей шаңырақ жанданып, жаңа белестерге қол жеткізді. Музей саласында 1967 жылдан бері еңбек еттім. Еліміздің тарихи мұраларын, жәдігерлерін таныту, оларды зерттеу – үлкен, қомақты шаруа. Осы жолда еңбектеніп жүрген әрбір қызметкерге тек табыс тілеймін,– деді Сахан Асайынқызы.
Мерекелік дастарқан басында викториналық ойындар ойнатылып, Қазақстанның еңбек сіңірген әртісі Бекболат Байсағатов пен музей қызметкерлері қонақтарға өнер көрсетіп, сыйлық табыс етті.
