«Олар бюджетке салық түрінде 552 млрд теңге төледі. «Даму» қоры шағын және орта бизнесті қолдау үшін бірқатар бағдарламаны, оның ішінде облыс әкімдігімен бірлесіп, «Кәсіпкер» аумақтық бағдарламасын белсенді іске асырып жатыр», дейді қордың аймақтағы филиалының директоры Әсет Тілемісов.
Жеке кәсіпкер Никита Дорош бірнеше жыл бұрын «Neyshes Boots» брендімен аяқкиім шығаратын кәсіпорын ашқан. «Дамудан» алған қаражат жас бизнесменге тиімді несие рәсімдеп, өндірісін кеңейтуге екпін берді.
«Біз нағыз былғарыдан аяқкиім тігіп, оны сатумен айналысамыз. Ең алғаш мұндай аяқкиімді Алматыдан тауып, сатып алдым. Соны тұтынып жүрдім. Кейін неге өңірімізден осындай кәсіп ашпасқа деп ойландым да, тәуекел еттім. Шеберлер таптым. Шаруамыз жаман емес. Таза былғарыдан тігеміз. «Даму» қорының көмегі кәсібіме жаңа тыныс әкелді. Олардың мұндай мүмкіндігін үш жылда үш мәрте игілігіме жараттым. Қажетті жабдықтар алдық. Материал қорын байыттық», дейді «Dorosh» компаниясының басшысы Никита Дорош.
Кабель өткізетін арнайы қорап өндіруге маманданып алған «Profland-RT» ЖШС компаниясы 2007 жылдан бері жұмыс істейді. Жыл сайын 5 мың тонна өнімін нарыққа шығарады. 2022 жылы «Бизнестің жол картасы – 2025» бағдарламасы негізінде кәсіпорын жабдықтарын сатып алу және өндірістік базаны жөндеуге 6 пайызбен, «Даму» қорының кепілдігімен екінші деңгейдегі банк арқылы 149 млн теңгеге екі кредиттік транш алады. Екі жылдан кейін бірыңғай кешенді бағдарламаның арқасында компания банк арқылы айналым қаражатын толықтыру мақсатында қаржыландырылды. Пайыздық мөлшерлеме 8 пайызға дейін төмендетіліп, «Даму» қорынан кепілдік алды.
«Компаниямызға 18 жыл толды. Күн электр стансаларының құрылысына, кабельдік науаларға, қосалқы құрылымдарға арналған металл профиль өндірумен айналысамыз. Өнім ассортименті үлкен. Өндірісте шамамен 70 адам жұмыс істейді. Айналым қаражатын және инвестициялық жобаларымызды несиелеу үшін «Дамуға» жүгініп, соның арқасында өнім қуатын арттырдық», дейді «Profland-RT» ЖШС директоры Артем Слесаренко.
Топардағы «AAA LLP» ЖШС жылыжайы заманауи агротехникалық әдістер мен технологияларды қолдана отырып негізінен қияр мен қызанақ өсіреді. Биыл Топар жылыжайы банк арқылы айналым қаражатын жылдық 10 пайызбен толықтырайын деп екі транш алады. Оған «Даму» қоры 84 пайыз көлемінде кепілдік береді.
«Даму» қорының, басқа да мемлекеттік бағдарламалардың қолдауымен кеңеюді жоспарлап отырмыз. 16 көкөніс түрін өсіреміз. Қиярдан бастап аскөкке дейін. Бүгінде жылыжайымызда 300-ге жуық адам жұмыс істейді. 6 000 тоннадан астам өнімді нарыққа шығарамыз», дейді «AAA LLP» ЖШС директоры Абдурауф Абдумавлонов.
Қарағанды облысы
