Қазақ балалар әдебиетінің классигі Бердібек Соқпақбаевтың 100 жылдық мерейтойы қарсаңында Бакуде «Менің атым Қожа» кітабының тұсаукесер рәсімі өтті. Түркі мәдениеті мен мұрасы қорының қатысуымен өткен шара X Баку кітап жәрмеңкесі аясында ұйымдастырылып отыр. Іс-шараға арнайы қатысқан Президент кеңесшісі Мәлік Отарбаев романның екі ел үшін де маңызды екенін жеткізді.
«Биыл қазақтың белгілі қаламгері Бердібек Соқпақбаевтың туғанына 100 жыл толып отыр. Мерейтой ЮНЕСКО көлемінде аталып өтілетін болып, арнайы кешенді іс-шаралар бағдарламасы әзірленді. X Баку кітап жәрмеңкесі қарсаңында «Менің атым Қожа» романы тұңғыш рет әзербайжан тілінде жарық көріп отыр. Соқпақбаев шығармалары өсіп келе жатқан жеткіншектердің ақыл-ойын жетілдіруде, екі елдің қарым-қатынасын нығайтуда басты рөл атқарады», деді ол.
Түркі мәдениеті мен мұрасы қорының президенті Ақтоты Райымқұлова романның 68 тілге аударылғанын, өтіп отырған елеулі іс-шара түркі әлемінің бай мұрасын сақтау мен болашақ ұрпаққа табыстауға бағытталғанын тілге тиек етті.
Жазушының қызы Самал Соқпақбаева жиналған көпшілікке ризашылығын білдіріп, Мемлекет басшысына алғыс айтты.
«Әкем Бердібек Соқпақбаевтың мерейтойын тек елімізде ғана емес, өзге де мемлекеттерде кеңінен атап өту туралы бастамасы үшін Президентіміз Қасым-Жомарт Тоқаевқа алғысымды білдіремін. Әзербайжан тарапына қос халықтың бірлігін нығайтатын іс-шара ұйымдастырғаны үшін ерекше алғыс айтамын», деді ол.
Тұсаукесер рәсіміне келушілер қаламгердің жеке заттарымен, сондай-ақ ыдыс-аяқтары және аксессуарларымен танысты. Мұнан соң Әзербайжан театрының әртістері «Менің атым Қожа» романынан үзінділер оқып, көрерменді тәнті етті.
