Сурет: ru.freepik.com
Іргедегі Жуалы ауданына қарасты Алатау ауылының тұрғыны Нәзира Байдосованың отбасы да мемлекет қолдауын айқын сезініп отыр. Алақандай елді мекен «Ауыл аманаты» бағдарламасына енген кезде бұл отбасы қарап жатпай, білек сыбанып іске кірісті. Дер кезінде қажетті құжатты әзірлеп, Зеңгі баба түлігін өсіруге ниет етті. «Елдар» жеке кәсіпкерлігін ашқан олар ата кәсіп арқылы мол табысқа кенелетініне сенімді болды. Нәтижесі көп күттірген жоқ.
«Расы керек, еңбек еткен адам табысқа кенеледі. Қазір «алма піс, аузыма түс» деп жататын уақыт емес. Іс бастаймын деген отбасыларға мемлекет тарапынан түрлі деңгейде қолдау көрсетіліп жатқанын көз көріп отыр. Тек әр адамның бойында кәсіпті дөңгелетіп әкетуге деген ниет болса жеткілікті. Отағасы Еркеұлан Байдосовтың қолдауының арқасында жыл бұрын «Ауыл аманаты» бағдарламасы арқылы жеңілдетілген пайызбен несие алуға ниет білдіріп, құжат тапсырып, тиесілі қаражатты алдық. Қолымызға тиген қаржының 7,5 млн теңгесіне мал, қалған қаражатқа жемшөп алдық. Осылайша, жаңа бір істі бастауға бел буып кірістік. Негізі, несие алудың өз критерийлері бар екен. Оның мақсаты мен міндетін ауылымызда жүргізілген түсіндіру жұмыстары кезінде толықтай білдік. Отбасымыздың жоба аясында несие рәсімдеуіне мамандардың да көп көмегі тиді», дейді Н.Байдосова мәселенің мәнісіне үңіліп.
Айтуынша, несие алуға құжат әзірлемей тұрып, Байдосовтар отбасы алдымен қора-жайды жаңалауға кірісіпті. Құжат тапсырған кезде мамандар мал ұстайтын қора-жайдың талапқа сай екенін ескерген көрінеді.
«Шынтуайтына келсек, мамандар несие алмай тұрып, қолға тиген қаражатты мақсатсыз жұмсауға болмайтынын ескертті. Мемлекет тарапынан жасалып отырған қамқорлықты тек қана іс бастауға пайдалану керектігін толық түсіндік. Бізге дұрыс бағыт-бағдар берген азаматтарға алғыстан басқа айтарымыз жоқ. Өйткені сол кісілердің қолдауы арқасында әрекетіміздің түбінде берекесін бере бастағанын сездік», дейді Н.Байдосова.
Алақандай Алатау ауылынан іргесін алыстатпаған Байдосовтар отбасы ұйқыны дұшпан деп таныған. Олар түнгі үштен бастап тіршіліктің қамына кіріседі. Отағасы Еркеұлан мен ұлдары малдың жемшөбін уақтылы берсе, Назира сиыр саууға кіріседі. Кейде сиыр саууға арналған аппаратты алма-кезек пайдаланып, Зеңбі баба тұқымы өріске шыққанға дейін тынымсыз еңбектенеді.
«Еткен еңбек пен төккен тер өз нәтижесін беріп жатыр. Күнделікті табысымыз баршылық. Сатып алған сиырларымыз төлдеді. Алған төлдің тең жартысын сатудың арқасында несиенің бір бөлігін төлеп тастадық. Мал шаруашылығын бес саусағындай жетік білетін мамандармен ұдайы байланысып тұрамыз. Соның арқасында түрлі аурудың алдын аламыз. Ауылымыз мал шаруашылығымен айналысуға қолайлы. Жайылым жердегі шөп құнарлы. Үй маңында өзімізге тиесілі жеріміз де бар. Жыл сайын 3-4 гектар алқапқа арпа, бидай егіп, уақтылы жемшөп дайындауды қолға алып жатырмыз. Шынашақтай кезімізден үлкендердің тәлімін алып өстік қой. Жасы егде кісілер бақыт пен байлықтың кілті еңбекте екенін санамызға әбден құйды. Ұзақ жыл бойы білім саласында еңбек етіп келемін. Жұмысым бар болса да, отбасымыздың мал шаруашылығымен айналысқанын құп көремін. Өйткені төрт түлік өсіру қанымызда бар қасиет. «Ауыл аманаты» ауыл халқының табысын арттыруға мол мүмкіндік тудырып отыр. Алдағы уақытта тағы бір кәсіпті игеріп, табысымызды арттырсақ деген ойымыз бар», дейді кейіпкеріміз.
Жоба аясында 2,5 пайыздық үстемемен 8,5 млн теңге несие рәсімдеген Байдосовтар отбасы 18 бас сауынды сиыр сатып алған. Ауылдағы қара шаңырақта үш ұл тәрбиелеп отырған олар күнделікті 180–190 литр шамасында сүт өткізіп, табыс тауып отыр.
Жамбыл облысы,
Жуалы ауданы,
Алатау ауылы
