«Армяндық «Бейбітшілік тірегі»: Оңтүстік Кавказдың ұлттық артықшылығы және тұрақты дамуының кепілі» тақырыбындағы дәрісін Армения басшысы өз тілінде оқыды. Ол әр ұлт ана тілінде сөйлеуі маңызды екенін айтты.
– Ресми кездесулерде мен де, Премьер-министріміз де өз тілімізде сөйлейміз. Мұны өте маңызды деп санаймын. Бұл өзімізді көрсету үшін ғана емес, шын мәнінде, біздің тәуелсіз, бақуатты мемлекет екенімізді тағы бір мәрте дәлелдейді, – деді В.Хачатурян.
Армения президентінің айтуынша, өз еліндегі жұмыссыздық – 12 пайыз. Десе де мемлекетте жұмыс күші тапшылығы сезіледі.
– Отандастарымызға белгілі бір салада жұмыс істеу тиімсіз болып көрінеді, сондықтан олар жұмыс істегісі жоқ. Сол себепті жұмыссыздар деп есептеледі. Дегенмен біздің көші-қон саясатымыз бар және сол арқылы Үндістаннан, басқа да шет мемлекеттерден жұмыс күшін тартамыз. Негізі түрлі бағалауға сәйкес, жұмыссыздық деңгейі 5 пайыздан аспауға тиіс, – деді ол.
Академияда Армения Президентіне прокторинг элементтері бар Admission (қабылдау комиссиясы) ақпараттық жүйесі мен iCademium (LMS) жүйесі көрсетілді. Сондай-ақ Ваагн Хачатурян біліктілікті арттыру курстары тыңдаушыларының коммуникативтік дағдыларын арттыру мақсатында пайдаланылатын медиа-студияның мүмкіндіктерімен, үздіксіз білім беру платформасы және қашықтан оқыту курстарын жазуға арналған JALINGA бейнестудиясымен танысты.
Ваагн Хачатурян өз сөзінде Қазақстан мен Армения арасындағы Достық пен ынтымақтастық туралы шартқа қол қойылғанына 25 жыл толғанын атап өтті. Сондай-ақ екі ел арасындағы достық қарым-қатынас ұзақ жылға жалғасатынына сенім білдірді.
Өз кезегінде Мемлекеттік басқару академиясының ректоры Ерлан Әбіл академияның білім алушылары ақпаратты бірінші басшыдан алғаны маңызды екенін жеткізді.
Академияның Дипломатия институтының магистранты кездесуден алған әсерімен бөлісті.
– Армения Президентімен кездесу өте қызықты әрі пайдалы болды. Армения экономикасының, көлік-логистика саласының, ауыл шаруашылығының дамуы туралы біраз ақпарат алдық, макроэкономикалық көрсеткіштерімен таныстық. Бұл – ерекше сипатқа ие кездесу. Президенттің академияға келіп, бізге дәріс оқуының өзі білімге назар аударатынын білдіреді, – деді Темірлан Сайлауұлы.
Президенттің дәрісіне Арменияның ресми делегациясы, оның ішінде Армения Республикасының Қазақстандағы Төтенше және өкілетті елшісі, Қазақстанның Армения Республикасындағы Төтенше және өкілетті елшісі, Армения Республикасының Білім, ғылым, мәдениет және спорт министрі, Армения Республикасы Сыртқы істер министрінің орынбасары, «Армения-Қазақстан» парламентаралық достық тобының жетекшісі, Президент әкімшілігі және БАҚ өкілдері, ҚР Сыртқы істер министрлігінің қызметкерлері, магистранттар, докторанттар, сондай-ақ академия қызметкерлері қатысты.
