Тарихи жәрмеңкеге отандық баспагерлер Мәдениет және ақпарат министрлігінің қолдауымен алғаш рет қатысты. Нәтижесінде, еуропалық көрермендерге еліміздің баспа өнімдерін насихаттайтын көрнекі стенд ұйымдастырумен қатар, көрме сөресіне еліміздің 250-ден аса авторының шығармасы жайғасты.
«Біздегі баспалардан: «Мектеп», «Алматыкітап», «Атамұра», «Arman-PV», «Steppe & World Publishing», «Astana-kitap», «АmalBooks» сынды мекемелер басып шығарған өнімдерді көре аласыздар. Сонымен қатар жоспарлы мәдени шара аясында қазақстандық «Steppe & World Publishing» баспа үйі аударған Михаэл Энденің «Аяқталмас хикая» және «Момо» кітабы, «Алматыкітап» баспасы «Менің Қазақстаным» сериясымен жарық көрген туындыларын ұсынады. Франкфурт қаласындағы еліміздің Бас консулдығында «Қазақстан жазушылары мен баспагерлерінің ұлттық және әлем әдебиетіндегі рөлі» тақырыбында әдеби-шығармашылық басқосу өтеді. Жәрмеңке жексенбі күні америкалық поляк тарихшысы Энн Эпплбаумға неміс кітап саудасының бейбітшілік сыйлығын тапсырумен аяқталады деп күтілуде», дейді ұйымдастырушы ведомствоның баспасөз қызметі.
Франкфурт кітап жәрмеңкесінің басты мақсаты – кітап саудасы мен нарығын халықаралық аренада жандандырып, жазушылар мен баспагерлерге қолдау көрсету. Жәрмеңкенің 550 жылдан астам тарихы бар. Алғаш рет 1473 жылы өткізілсе, 1574 жылдан бастап жүйелі түрде қолға алынған. Франкфурт кітап жәрмеңкесі Майнцта (Франкфурт маңында) Иоганн Гутенберг негізін қалаған кітап баспасымен тығыз байланысты. Содан бері Франкфурт – Еуропаның кітаптар астанасы атанған. Дәстүрлі жәрмеңкеге әлемдегі үздік баспагерлер, кітап сатушылар, кітапханашылар, ғалымдар, аудармашылар, суретшілер, тағы да басқа кітап ісіне қатысты түрлі сала өкілдері қатысады.
Осындай маңызды жәрмеңке төрінен қазақстандық өнімдердің де орын алуы құптарлық дүние. Бұл туралы пікір білдірген Мәдениет және ақпарат министрлігі Архив, құжаттама және кітап ісі комитетінің төрағасы Рустам Әли: «Отандық баспагерлердің «Frankfurter Buchmesse-2024» кітап жәрмеңкесіне қатысуы – біз үшін маңызды тарихи оқиға. Дүниежүзілік алаңда өзіміздің мәдени мұрамызды таныстырып, отандық авторлар мен баспагерлерді әлемдік деңгейде көрсету мүмкіндігі туып отыр. Халықаралық кітап жәрмеңкесі аясында отандық басылымдар мен шығармаларды көрсетіп қана қоймай, маңызды кездесулер мен келіссөздер өткізіп, болашаққа арналған стратегиялық байланыстар орнатамыз деп жоспарлап отырмыз», дейді.
Расында, бұл бастама отандық кітап нарығын дамыту, оны жаңа деңгейге көтеру, авторлардың шығармаларын жаһанға таратуға мүмкіндік берері сөзсіз. Сондай-ақ кітап жәрмеңкесі аясында құқықтарды басқару, серіктестік, жасанды интеллект пен машиналық оқытуды қолдану, деректер негізіндегі маркетинг және цифрлық трансформация тақырыптары бойынша пікір алмасу мен тәжірибе бөлісу жайы да жоспарда бар көрінеді.
Жаһанға әйгілі жәрмеңкенің маңызы туралы Қазақстан Жазушылар одағының төрағасы Мереке Құлкенов: «Бұл жәрмеңке Мемлекет басшысының Ұлттық құрылтайда айтқан кітап оқу мәдениетін қалыптастырудың қаншалықты маңызды екенін көрсетеді. Бүгінде біз кітаптың, білім алу құралы ғана емес, қоғамның мәдени деңгейін көтерудің негізгі тетігі екенін терең түсінуіміз керек. Қазақстанның әдебиеті мен мәдениетін халықаралық аренаға шығару – одақ үшін үлкен жауапкершілік әрі тарихи міндет. Осы жәрмеңке арқылы әдеби мұрамызды жаңа биіктерге көтереміз деп сенемін. Жазушылар одағы әрқашан бұл үдерісте қаламгерлерге қолдау көрсетіп, олардың шығармаларын әлемге танытуға барын салады», деп сөзін түйіндеді.
