«Солтүстік Пальмирадан» арнайы келген сән экспресі елорда тұрғындарын Санкт-Петербургтің сапалы брендтерімен таныстырып, заманауи сән әлеміндегі өзекті үрдістерді талқылады. Сондай-ақ іскерлік байланыстар орнатып, жаңа серіктестер табу мақсатында кездесулер де өткізді.
Айта кетейік, аталған сән сапарын «Санкт-Петербург экспортты қолдау орталығы» АНО ұйымдастырып отыр. Сапар аясында қатысушыларға «Fashion.Export» білім бағдарламасының бір бөлігіне айналған бірқатар іс-шара ұсынылды. Бұл бағдарлама талантты дизайнерлерді қолдауға, оларға халықаралық нарыққа шығуға мүмкіндік беруге бағытталған.
Елордалық сәнгерлерді ресейлік дизайнерлердің прет-а-порте коллекцияларының жабық көрсетіліміне қатысып, ой бөлісу, шеберлік алмасу сынды шығармашылық байланыстар шабыттандыра түскені анық. Әлеуетті серіктестер мен шығармашылық ортаның өкілдері сән индустриясындағы халықаралық ынтымақтастықтың шекарасын кеңейтіп, келіссөздер жүргізді.
«Bibisara» сән үйінде өткен ресейлік өндірушілер киімдерінің жабық көрсетілімі де сәтті жобаларға ұласты. Жабық көрсетілімге Санкт-Петербург брендтерінің өкілдері де қатысты. Әр дизайнердің өз қолтаңбасы, өз стилі бірден көзге ұрады. Бренд иелерінің айтуынша, сапа – кез келген өнімнің басты кілті. Сол сапа мен үйлесім, сұлулық сай келгенде ұсынылған өнім жоғары бағаланады.
«Catarina Nova» әйелдер киімінің негізін қалаушы Татьяна Семенова өз өнімдерін таныстыра келе, басты мақсат – киімнің көмегімен әр әйелдің өзіне және айналасындағыларға көңіл күй сыйлау мүмкіндігі бар екенін дәлелдеу дейді.
«Біздің ассортиментте сыртқы киімдер, костюмдер, көйлектер, белдемшелер мен шалбар және басқасы бар. Жұмыс барысында әр киімге бөлек талғаммен мұқият қараймыз, тек жоғары сапалы материалдарды таңдаймыз. Біз коллекциямызды Санкт-Петербургте өз өндірісімізде тігеміз. Тұрақты тұтынушылар біздің өнімдердің ыңғайлы, сапалы екенін жиі айтады», дейді Т.Семенова.
Ал Санкт-Петербургтің «Gerrusi» брендінің басты ұраны – талғампаздық. Елена мен Родион Мальцев өздері негізін қалаған отбасылық кәсіпті сипаттай отырып, брендтің ерекшеліктерін атап өтті.
«Кез келген дене бітімінің «кемшіліктері» болады. Бұл, әрине, кемшілік емес. Бірақ халық денесіндегі артық-ауыс тұстарын кемшілік деп қабылдайды. Сондықтан ең алдымен өз «кемшіліктерін» жасыратын киім іздейді. Біздің өнімнің ерекшелігі де осы – адамның дене бітімі қандай болса да барынша сұлу мүсін қылып көрсетеді. Дененің жасыратын тұстарын шебер жасырып, көрсететін тұстарын ерекшелеп тұрады. Киім – ең алдымен, өмір сүруге қажеттілік болса, одан соң – сән үлгісі. Киімді қоғам сән үшін киеді, сән үшін таңдап, талғайды», дейді олар.
Сондай-ақ астаналықтарды күнделікті өмірге арналған сәнді киіммен Onicape дизайнерлері таныстырды. Бұл брендтің өкілдері өнім дизайнына тарихи қала Санкт-Петербургтің ауа райы мен ерекше сәулетінен идеялық шабыт алғанын айтты.
«2016 жылы алғашқы топтамамызды шығардық. Әлі күнге дейін сұранысқа ие. Киім тігу кезінде біз стильге, түстердің алуан түрлілігіне және практикалыққа ерекше назар аударамыз. Біз тек сапалы материалдарды, дәлелденген жабдықтар мен инновациялық маталарды қолданамыз. Мұндай киім жаңбыр мен желден қорғайды, дененің тыныс алуына мүмкіндік береді», дейді Onicape өкілі.
Сән сапары аясында ресейлік дизайнерлер қазақстандық серіктестермен заманауи сән туралы өз идеяларымен бөлісіп, жемісті ынтымақтастықтың түрлі нұсқа-
ларын ұсынды. Ұйымдастырушылар бұл сапар екі қала арасындағы сән және мәдени алмасу әлеміндегі маңызды оқиғаға айналғанына, шығармашылық индустриялардың дамуына, халықаралық байланыстардың нығаюына ықпал ететініне сенімді.
Бүгінгі қоғам – нарықтың заманы. Бәсекелестік те әлемді билеп тұр. Осы орайда екі ел сән мамандарының келелі кездесулері жаңа жобаларға, тың өзгерістерге бастайтыны сөзсіз.
