«Ақтөбе» әлеуметтік-кәсіпкерлік корпорациясы биылғы 9 айдың қорытындысы бойынша 463,5 млн теңге пайда тапса, жыл соңына дейін кіріс көлемі әлі де ұлғаяды деген болжам бар. Осы жетістікке шағын және орта кәсіпкерлік нысандарының жұмысын жолға қою мен «Ауыл аманаты» жобасымен жеңілдікпен несие беру бағдарламасына бөлінген қаражатты игеру арқылы қол жеткізілді.
«Ауыл аманаты» жобасы іске қосылған уақыттан бастап 2 702 өтінім мақұлданып, 15 млрд теңге көлемінде жеңілдетілген несие берілді. Осылайша, елді мекендердегі жұмыссыздықты азайту мен ауыл шаруашылығы өнімдерін ұлғайту мақсатында үш жыл бұрын қолға алынған қанатқақты жоба тиімділігін көрсетті. «Ақтөбе» ӘКК жанынан ашылған фронт-кеңседе өтінімдерді «бір терезе» қағидаты негізінде қарау жобаға қатысушылардың уақытын үнемдеді.
Сонымен қатар инвестициялық жобаларды несиелеу бағыты бойынша «Ақтөбе» ӘКК АҚ Ақтөбе облысындағы ең ірі сүт өңдеушілердің бірі «Айс плюс» ЖШС-ның асыл тұқымды ірі қара сатып алу арқылы сүт фермасын кеңейту жобасына қолдау көрсетті. 4,6 млрд теңге құрайтын осы жобаның 3,25 млрд теңгесі жеңілдікпен қаржыландырылды. Бұл өз кезегіндегі өңірдегі сүт тапшылығын жоюға бағытталып отыр.
Ақтөбе облысы
