Аталған іс-шара елімізді Алтын Орда (Жошы ұлысы) империясының мұрагері ретінде және сол кезеңнің бай тарихи-мәдени мұрасын сақтап отырған мемлекет ретінде көрсетуді мақсат етеді.
Көрмеге Алтын Орда кезеңіне жататын кесенелердің безендірілген кірпіштері, сол кезеңдегі тұлғалардың балауыз мүсіндері, Жошы хан кесенесінің құббасы, Сарайшық қаласынан табылған құмыралар мен ыдыс-аяқтар, ортағасырлық бірегей монеталар, сондай-ақ тарихи қолжазбалардың көшірмелері, карталар мен картиналар, Жошы ұлысының тарихына қатысты кітаптар және басқа да құнды жәдігерлер қойылды.
Жиында сөз алған Мәдениет және ақпарат министрлігі Мәдениет комитеті төрағасының орынбасары Айдын Боранбайұлы Алтын Орданың тарихы қазіргі қазақ мемлекеттілігінің жылнамасымен тығыз байланысты екенін атап өтті.
«Аумағы ұлан-ғайыр империяның негізін қалаған Жошы ханның кесенесі мен әлемге әйгілі болған Сарайшық қаласының Қазақстан аумағында орналасуы – осының жарқын дәлелі. Ата-бабаларымыз құрған қуатты мемлекеттің екі ғасырдан астам уақыт Еуразияның геосаяси жағдайына қатты ықпал етіп отырғанына тарихымыз куә бола алады. Сондай-ақ Президентіміз Қасым-Жомарт Кемелұлы Алтын Орданың тарихына ерекше мән беріп жүргені және оның тапсырмасымен аз уақыттың ішінде елімізде мәдениет, ғылым, ақпарат салаларында бірқатар маңызды шаруалар атқарылып жатқаны белгілі. Атап айтсақ, Жошы Ұлысын зерттейтін ғылыми институт құрылып, табысты еңбек етіп жатыр. Қазақстанның 7 томдық жаңа академиялық тарихы жазылып, оның 1-томы Жошы ұлысының тарихына арналды. Еліміздің көптеген қалаларында ғылыми-практикалық конференциялар, семинарлар, конгрестер, арнайы экспедициялар өтіп жатыр. Ұлытаудағы Жошы хан, Домбауыл кесенелеріне апаратын жолды салу жұмысы аяқталуға жақын. Алтын Орданың кезеңіне, Жошы ханның өміріне арналған ғылыми, әдеби туындылар жарық көріп отыр», деді ол.
Іс-шараға «Ұлытау» ұлттық тарихи-мәдени және табиғи музей-қорығы, «Сарайшық» мемлекеттік тарихи-мәдени музей-қорығы, Қарағанды облыстық тарихи-өлкетану музейі, Қолжазбалар жəне сирек кітаптар ұлттық орталығы, ҚР Қарулы күштерінің Әскери-тарихи және «Қазақмыс» корпорациясының Қ.Сәтбаев атындағы тарихи-өндірістік музейлері қатысты.
Айта кетейік, қазіргі уақытта «Ұлытау» ұлттық тарихи-мәдени және табиғи музей-қорығының аумағында Алтын Орда дәуіріне жататын оннан аса тарихи ескерткіштер сақталған. Атап айтсақ, Жошы хан, Болған ана, Құлан ана, Аяққамыр (Құтлық Темір), Талмас ата, Келінтам кесенелері, Едіге мазары, Алтыншоқы төбесі және басқалары бар.
