Қызылордадағы М.Мәметова атындағы педагогикалық училищенің студенті кезінен өнерімен танылған талапты жастың бағын ашқан туынды – композитор Бексұлтан Байкенжеевтің әйгілі «Ақбаян» әні болды. Алғашқы қатысқан байқауы – Алматыда өткен көркемөнерпаздар өнер бәйгесінде осы әнмен жүлделі орынға ие болған әншіні күллі жұрт «Ән әлемінің Ақбаяны» деп алақанында аялады.
Педучилищеден кейін Қазақтың қыздар педагогикалық институтының музыка факультетін бітірсе де өнер жолына бірден түсе қоймаған кезінде қазақтың қабырғалы қайраткері Өзбекәлі Жәнібеков қамқорлық танытып, облыстық филармонияға қабылдап, дарынды жасқа жол ашты. Жас әншінің репертуарын да әркез қадағалап, бағыт-бағдар беріп отырған ұлт мәдениетін ұлықтаған қайраткердің арқасында Мәдина есімі ән көгінде еркін қалықтады.
Өмірінің соңғы жылдарында тағдыр тылсымын болжағандай «Есіңе мені алғайсың», «Күрең күз» әндерін жиі орындаған әнші осыдан 24 жыл бұрын қарашаның суық кешінде күре жолдың бойында көлік апатынан қапыда көз жұмды. Сол сәт күллі жұрт ән аспанындағы сыңғыр үн кенеттен үзіліп түскендей күй кешкені рас.
Үлкен экраннан берілген Мәдина әндерінен басталған байқауда қала әкімінің орынбасары Дархан Тұрсынбаев артында өшпес із қалдырған әншінің ұлт өнеріндегі орнына тоқталып, байқау қатысушыларына сәттілік тіледі.
Композитор, Қазақстанның еңбек сіңірген қайраткері Рамазан Тайманов, композитор, Мәдениет саласының үздігі Сәбит Ұлықпанұлы, облыстық халық шығармашылығын дамыту және мәдени-продюсерлік орталығының көркемдік жетекшісі Руслан Бурабай қазылық еткен байқауда 20-35 жас аралығындағы 8 өнерпаз бақ сынады.
Қатысушылар екі кезеңнен тұратын байқаудың алғашқы сатысында Мәдина Ералиева репертуарынан бір ән, екінші кезеңде өз мүмкіндігін көрсететін тағы бір туынды орындады. Сыр сандуғашының өнерін насихаттап, жастар талабын қолдауға арналған конкурс қорытындысы бойынша жүлделі III орынды Жалағаш ауданынан Орнықхан Пазыл, II орынды жаңақорғандық Исламхан Нағызхан, бірінші орынды қызылордалық Әйгерім Шүкірбаева иеленді.
Байқаудың бас жүлдесін Сырдария ауданынан келген Аяулым Бекболатова жеңіп алды.
Қызылорда
