Кездесуге Қарағанды медицина колледжінің студенттері, кітапхана ұжымы мен ақындар Қуаныш Мақсұтов, Серғазы Қабылдаұлы, өлкетанушы, журналист Аңғар Смағұлов, ұстаз Ғазиза Ғабдоллақызы, қолөнер шебері Қылышбек Құрмантегі қатысты.
Сатирик шығармашылыққа келген жолын әсермен жеткізді. Әзіл-оспақ жанрында алғаш қалам тербеп жүргенде «Қисық шеге» деген шағын сатиралық әңгімелер жинағының жарық көріп, кейін шығармалары «Мырс-Мырс» кітабымен оқырмандарға жол тартқандығы жөнінде әңгімеледі.
«Облыстық «Ortalyq Qazastan» газетінің тоқсан жылдығы қарсаңында сатиралық әңгімелерім баспадан кітап болып жарық көрді. Кітаптың таныстырылымын жасадық. Ұстазым Көпен Әмірбек келіп, батасын берді. Көпен ағамен «Айқын» газетінде бірге қызмет етіп, «Ара» апталығын шығардық. «Мырс-Мырс» кітабыма енген шығармаларым сол кезде жазылған. Қазір «Түнделік» айдарымен шағын сатира жазып жатырмын», деді кеш қонағы.
Кездесуге келген меймандар қаламгердің болмысы бала секілді екенін, жүріс-тұрысының өзі сатирик екенін аңғартатынын айтты.
Сатира саңлағы Көпен Әмірбектен: «Әдебиеттің шеберлігіне шек қоймаймын. Адыр-бұдырлы ағаштың ажарын ашып, темірден түйін түйгендей ұлы сатираның ұстасына айналсын деп тілеймін», деп бата алған сатирик-жазушыға жиналған жұрт қоғамның қордаланған мәселелерін ащы мысқылмен жеткізе беруі үшін қаламына қуат тіледі.
Қарағанды облысы
