Дерекке жүгінсек, мұнда 102 бала тәрбиеленіп жатыр екен. Басқосу барысында Ғани Бектенұлы буыны бекіп, қанаты қатаймай жатып тағдырдың түрлі сынағына тап болған жасөспірімдермен тілдесіп, олардың қажеттіліктеріне назар аударды. Министр өз сөзінде әр баланың құқығын қорғаудың маңыздылығын атап өтіп, қауіпсіз орта қалыптастыру қажеттігін тілге тиек етті. Сондай-ақ жергілікті атқарушы билік өкілдеріне әдістемелік қызметтер мен өңірлік педагогикалық қолдау орталықтарының қызметін күшейтуді тапсырды.
«Балалардың қауіпсіздігін қамтамасыз ету және олардың құқығын қорғау – мемлекет саясатының басты бағыты. Еліміздегі әрбір бала өзін ересек адамдардың қамқорлығында екенін сезінуі керек. Ол үшін барлық уәкілетті органдар өз міндетін мінсіз атқарып, жергілікті жерде жұмысты дұрыс үйлестіргені ләзім.
Президент тапсырмасы бойынша осы жылдан бастап, барлық өңірде психологиялық қолдау орталығы ашылды. Психолог мамандардың жұмысын күшейте отырып, балалар құқығының бұзылуына қатысты жайттардың алдын алған жөн деп білемін. Осы тұста балаларды жалпыұлттық құндылық рухында тәрбиелеуге бағытталған «Біртұтас тәрбие» бағдарламасы негізгі рөл атқаратынын ұмытпаған абзал», деді министр өз ойын ортаға салып.
Кейіннен «Бақытты болашақ» оқушылар сарайында өткен кездесуде министр білім алушылармен еркін форматта әңгіме-дүкен құрды. Білім саласында қолға алынған жаңашыл бастамалар мен оқушыларды қолдау бағытында қолға алынған жұмыстар туралы әңгімеледі. Ғ.Бейсембаевтың айтуынша, болашақта білім бәсекелерінде топ жарған оқушыларға құрмет көрсетіліп, қаржылай сыйақы тағайындалады.
«Білімді ұрпақ – ел ертеңінің кепілі. Билік білімді оқушыларды әрқашан қолдауға дайын. Енді халықаралық олимпиадада топ жарған жеңімпаздар мен жүлдегерлер қомақты қаржылай сыйақы алады. Бұл – білім жарыстарына қызығушылықты арттырып, үздіктерді ынталандыру мақсатында қолға алынған жұмыс. Мәселен, халықаралық олимпиадаларда жеңіске жеткен оқушыларға біржолғы сыйақы ретінде 5,5 миллион теңгеге дейін қарастырылған. Сонымен қатар жеңімпаздарға отандық жоғары оқу орындарының гранттары табысталады. Осылайша, дарынды жастарға үлкен қолдау көрсетіліп, олардың білімі мен жетістіктері лайықты деңгейде бағаланады. Жеңімпаздарды дайындаған педагогтердің де еңбегі елеусіз қалмайды», деді министр.
Мемлекет басшысы Қасым-Жомарт Тоқаевтың тікелей тапсырмасына сәйкес, білімді әрі бәсекеге қабілетті жастардың қатарын арттыру мақсатында республика бойынша ілкімді істер қолға алынған. Айталық, соңғы 5 жылдың ішінде елімізде 1 миллион оқушыға арналған бір мыңнан аса мектептің құрылысы қарқын алды. Бұдан бөлек, барлық білім ошағын «Жайлы мектеп» деңгейіне жеткізу бойынша жүйелі жұмыстар атқарылып жатыр. Нәтижесінде, 2027-2028 жылға дейін еліміздегі барлық мектептің инфрақұрылымы жақсарып, оқушылар жоғары жылдамдықты интернет пен заманауи үлгіде пәндік кабинеттерге қол жеткізбек. Осындай мәліметтермен бөліскен Ғани Бейсембаев әрбір педагог өз мамандығына адалдық танытып, ұрпақ тәрбиелеу ісіне үлестерін қосуы қажеттігін жеткізді.
Оқу-ағарту министрі Ғани Бейсембаев, облыс әкімінің орынбасары Серік Сәлемов, облыстық білім басқармасының басшысы Рауан Садырқұловтың қатысуымен өткен кездесуге қатысушылар спикерлерге көкейде жүрген сауалдарын қойып, ұтымды жауаптар алды.
Жамбыл облысы
