Банк басшысы Одиль Рено-Бассо Қазақстан Президенті Қасым-Жомарт Тоқаевпен кездесуінде ел Үкіметінің Қазақстандағы инвестициялық ахуалды жақсарту, 2029 жылға қарай ІЖӨ-ні екі есеге арттыру мақсатында экономикалық реформаларды жеделдету жөніндегі бастамалары жөнінде оң пікір білдірді. Рено-Бассо ханым сондай-ақ Шетелдік инвесторлар кеңесінің 36-пленарлық отырысына қатысты.
ЕҚҚДБ алдағы 5 жылда еліміздің энергетика және коммуналдық секторын жаңғырту жөніндегі ұлттық жобасына кемінде 2 миллиард еуро инвестициялауға дайын.
ЕҚҚДБ президенті жаңартылатын энергия көздерін біріктіру үшін ұлттық желі инфрақұрылымына одан әрі инвестиция құюдың маңыздылығын атап өтті және банктің «Батыс аймақты қосу» жобасын жүзеге асыру үшін Қазақстан электр желілерін басқару компаниясымен (KEGOC) жұмыс істеп жатқанын жеткізді.
Банк «Самұрық-Қазына» АҚ сатып алу ережесіне, оның «KEGOC» АҚ жобасына қолдануға мүмкіндік беретін ашықтығына оң баға берді. ЕҚҚДБ стратегиялық инвестициялық жобаларды іске асыру, қордың тауарлар мен қызметтерді сатып алу тәжірибесін банктің тиісті ережесімен, осы саладағы озық әлемдік тәжірибемен одан әрі үйлестіру үшін «Самұрық-Қазына» компаниялар тобымен тығыз жұмыс істеуді жалғастырмақ.
