- Халықаралық семсерлесу федерациясының (FIE) әлемдік рейтингі жаңартылды. Біздің ерлер құрамасы көрсеткішін жақсартып, екі сатыға өрледі. Жуырда Швейцарияның Берн қаласында әлем кубогінің кезеңі өтті. 35 команда арасында саңлақтарымыз 7-орынға тұрақтады. Соның нәтижесінде әлемдік рейтингтегі көрсеткіште жақсарып, 4-сатыға орнықты.
- Ресейдің Мәскеу қаласында WKF каратэден Moscow Karate Universe -2024 халықаралық турнирі өтті. 31 елден 329 спортшы қатысқан айтулы додада саңлақтарымыз 8 медаль олжалады. Қыздар сынында Мөлдір Жаңбырбай (50 кг) мен Софья Берульцева (+68 кг) чемпион атанса, Гүлмира Үсенова (55 кг), Лаура Сағынбек (68 кг) финалдық бәсекеде сүрініп, күміс медальды місе тұтты. Ерлер додасында Никита Тарнакин (84 кг) барлық қарсыласын айқын ұтып, алтын медаль еншілесе, Диас Анарбеков (+84 кг), Жоламан Биғабыл (60 кг), Данияр Юлдашевке (84 кг) қола жүлде бұйырды.
- Тараз қаласында күрес түрлерінен Қазақстан кубогі өтіп жатыр. Бозкілемге алдымен грек-рим күресінің балуандары шықты. Елішілік сайыста мына балуандар чемпион атанды: 55 кг – Ербол Камалиев (Алматы облысы), 60 кг – Бақытжан Қабдыл (Алматы облысы), 63 кг – Мейрамбек Айнағұлов (Ақтөбе облысы), 67 кг – Мейіржан Шермахамбет (Шымкент қаласы), 72 кг – Әділхан Сатаев (Шымкент қаласы), 77 кг – Ибрагим Магомадов (Қарағанды облысы), 82 кг – Омар Сатаев (Шымкент қаласы), 87 кг – Шәміл Ожаев (Алматы қаласы), 97 кг – Ильяс Гучигов (Шымкент), 130 кг – Әлімхан Сыздықов (Шымкент қаласы).
- Әйелдер күресінен 10 салмақ дәрежесінде өткен додада мына балуандар чемпион атанды: 50 кг – Светлана Анкичева (Астана), 53 кг – Зейнеп Баянова (БҚО), 55 кг – Марина Седнева, 57 кг – Нилуфар Раймова (Түркістан облысы), 59 кг – Гүлдана Бекеш (Қарағанды облысы), 62 кг – Виктория Хусаинова (Ақмола облысы), 65 кг – Елена Шалыгина (Астана), 68 кг – Ирина Казюлина (Абай облысы), 72 кг – Анастасия Панасович (БҚО), 76 кг – Гүлмарал Еркебаева (Астана).
- Қытайда грек-рим күресінен 20 жасқа дейінгі балуандар арасында халықаралық турнир өтті. 67 кг салмақта белдескен Юсуф Ашрапов чемпион атанса, 87 кг-да сынға түскен Нұрасыл Аманалы күміс, Бағлан Қуанышев қола медаль еншіледі.
