Оны Ә.Бөкейхан Алаш ғылыми-зерттеу институты, «Qyr balasy» ҚҚ және жоғары да аталған білім ордасымен бірлесіп өткізді. Іс-шара аясында «Qyr balasy» қоғамдық қоры басып шығарған кітаптардың тұсауы кесіліп, көпшілікке таныстырылды. Айталық, биыл «Алаш кітапханасы» сериясымен Нұғыман Манай, Ғазымбек Бірімжанның шығармалар жинағы және «Жетісудағы Алаш тарихы: Жаркент іздері», «Қаныш Сәтбаев феномені» зерттеу еңбектері оқырманға жол тартты. Сондай-ақ «Ұлтты оятқан ұлы сөз» сериясымен Әлихан Бөкейхан, Ахмет Байтұрсынұлы, Міржақып Дулатұлы, Халел Досмұхамедұлы, Мұстафа Шоқай сынды Алаш зиялыларының нақыл сөздері топтастырылып, жеке кітапша ретінде жарық көрген.
Мәдени іс-шара басында сөз алған Абай Құнанбайұлы атындағы №87 мектеп-гимназиясының директоры Айгүл Оңдағанқызы: «Біз осындай іс-шаралар арқылы мектебіміздегі жас ұрпақтардың санасына ұлттық тәрбие ұғымын сіңіріп, олардың елінің, жерінің, ұлтының тарихы мен мәдениетін, салты мен дәстүрін жақсы білетін білім иелері етіп тәрбиелеуге құлшынып жатырмыз. Бір сөзбен айтқанда, біздің мақсатымыз – тұлға тәрбиелеу, қалыптастыру», деді ол.
Әдеби жиынға Қайсар Әлім, Айгүл Серікқызы, Ербол Ердембекұлы, Марат Әбсемет, Шолпан Тілепина, Сағымбай Жұмағұл, Алмас Жұмағали, Қайырбек Кемеңгер, Алма Сайлауқызы, т.б. сынды алаштанушы – ғалымдар мен Роза Бақтығалиқызы, Ризабек Кемеңгер, Камлет Баяхметұлы секілді Алаш ардақтыларының ұрпақтары сөз алып, Алаш арыстары туралы парасатты ой толғады. Сонымен қатар Абай мектебінің оқушылары Міржақып Дулатұлы туралы «Азаматы Алаштың» атты қойылым қойды. 11 «Ә» сынып оқушысы Саяжан Азаматқызы М.Дулатұлының «Қазақ тілінің мұңы» мақаласын, бастауыш сынып оқушылары Алаш арыстары туралы өлеңдерді жатқа оқыды. Әсіресе жас суретші Назерке Болатқызының Алаш арыстарының әр кездегі бейнесін қылқаламмен сөйлеткен туындылары кешке қатысқан барша қауымның қызығушылығын туғызды. Мұны мектеп оқушыларына ұлттық тәлім-тәрбие берудің жаңаша жолы деп түсінуге болады.
Мазмұнды іс-шарадағы тағы бір ерекшелік – Астанадағы Алаш қайраткерлерінің есімі берілген мектеп директорлары мен мұғалімдері де осы басқосуға қатысып, өз ойларымен бөлісті. «Qyr balasy» қоғамдық қорының президенті Жанболат Абайхан мен құрылтайшысы Ертай Біләл жаңа краудфандингке үлес қосқан азаматтарға кітаптар табыстады.
«Алаш» ғылыми-зерттеу институтының директоры Ұшқын Сәйдірахман «Алаш мұрасын оқыту – ұлттық тәрбие өзегі» тақырыбында баяндама жасап, «мектепте тілдік орта қалыптастыру, іс-шаралардың қазақ тілінде өтуін негіз ету, ұлттық құндылықтарды дәріптейтін арнайы жобалар дайындау, ұлттық мәдениетті тәжірибеге енгізу, Алаш арыстарының атын иеленген мектептердің одағын құру және сол мектептердің оқушылары арасында «Алаш олимпиядасын» өткізу» атты ұсынысын ортаға салды.
Жиын соңында Ербол Ердембекұлы мен Роза Бақтығалиқызына «Алаш зиялысы» медалі, Шолпан Тілепина, Камлет Баяхметұлы және Мұрат Ескендірұлына «Барлыбек Сырттанұлы» медалі табысталды. Белсенді демеуші азаматтардың атынан үздік 20 оқушыға «Алаш стипендиясы» берілді.
