Сүт өнімі өндірісін көбейтумен қатар жаңа жұмыс орындарының ашылуы жергілікті жұрт үшін ақ түйенің қарны жарылған қуанышқа айналған. Ауылда қол қусырып қарап отырған адам жоқ. Еңбекақылары уақтылы әрі қомақты төленгеннен кейін түгелге жуық ортақ іске өз үлестерін қосып жатыр. Кейбір жерлердегідей туған жердің топырағынан үдере көшу байқалмайды. Белсенді іс-қимылдары арқылы ел еңсесін көтеруге септігін тигізіп келе жатқан серіктестік өңірдегі осы тектес ауыл шаруашылығы кәсіпорындарына елге деген жанашырлығымен, қамқорлығымен үлгі. Енді осы толайым табысты сәл ғана таратып айталық. Өткен жылы қолға алынған инвестициялық жоба кезең-кезеңімен жүзеге асырылып, 400 бас ірі қараға шақталған ферманың құрылысы аяқталды. Құрылтайшылар жобаны толық аяқтап шығу үшін өздерінің 700 млн теңге қаражатын жұмсады. Қазір компания «Көкше» әлеуметтік-кәсіпкерлік корпорациясынан 1 млрд 87 млн теңге несие алып, екінші ферманың құрылысын бастап кетті. Жаңа ферма да 400 бас қара малға лайықталған.
Өндіріс өрісінің кеңеюі мал сүмесімен күн көріп отырған жергілікті жұртқа да пайдалы. Толымды табысы бар жаңа жұмыс орындары ашылады. Біреуі мал бақса, біреуі сиыр сауып, адал еңбектерімен әлеуметтік-тұрмыстық жағдайын жақсартады. Қазақша айтқанда, кәдімгі күнкөріс көзі.
Сүт өнімдерін өңдеуді жолға қою үшін жаңа технологияны пайдаланып отыр. Төрт түлік малдың бабын табу жергілікті жұрт үшін таңсық шаруа емес. Ал өнімін өңдеу айрықша маңызды мәселе. Бұрынғыдай «қойын құрттап, сүтін ұрттап» барға қанағат деп жүре беруге болмайды. Бар дүниені ұқсата білген жөн. Адырлы, тастақ, шөбі құнарлы өлке қара мал үшін мейлінше қолайлы. Әйтсе де, тыңға түрен салған әнебір жылдары құйқалы өңірдің құты қашқаны да шындық. Сондықтан, мал азығын мейлінше түрлендіріп, мол дайындамай, қыр асу қиындай бермекші. Мәселенің мәнісін жақсы түсінген серіктестік «сиырдың сүті тілінде» екенін жақсы біледі. Мал бағу әдісін де ғылыми негізде жетілдіріп, толымды етуде.
Бүгінгі күні жоғары сапалы өнім өңдейтін түрік құрылғысы алынбақ. Жалпы құнының тоқсан пайызы төленіп те қойылды. Осы айдың соңына дейін сүт өнімдерін өңдейтін шетелдік құрылғы толық жеткізілмек. 410 бас герефорд асыл тұқымды сиырына келісімшарт жасалды. Алғашқы 30 бас ірі қара жеткізіліп, карантинге қойылған. Алдағы жылдың алғашқы жартыжылдығында толық жеткізілмек. Осылайша, мал тұқымы асылдандырылып, сапасы жақсартыла түспек.
Серіктестік сенімді қадам жасаумен қатар алдарына биік мақсат та қойып отыр. Нәтижеге қол жеткізетіндігі сөзсіз. Өйткені серіктестік басшысы Ерлан Алин іскерлігімен танылған азамат. Тәжірибелі басшы ауыл шаруашылығының жілігін шағып, майын ішкен майталман маман ғана емес, сонымен бірге, туған жердің түтінін түзу ұшыруға аянбай ат салысып жүрген жанашыр жан. Еңбегіне қарай үшінші дәрежелі «Еңбек даңқы» орденімен және бірнеше медальмен марапатталған, Жарқайың ауданының құрметті азаматы.
Жарқайыңдықтар үшін Ерлан Алиннің табанды еңбегі әдемі үлгіге айналған. Бұл төңіректе шаруашылық туралы сұрай қалсаңыз, халықтың дені осы серіктестікті мақтана ауызға алары сөзсіз. Ауа райы күрт өзгеріп, кей жылдары қырын қабақ танытса да, жұртты жақсылыққа бастап, адал еңбекке ұйымдастырып, күш-қуат, қажыр-қайратын бір арнада тоғыстыра білетін және болашағын болжап, келешегін кемел етуге тырысатын еңбеккер жанның бейнесі нағыз бүгінгі күннің қаһарманы кейпінде. Бір қызығы, серіктестік басшысының өткеніне үңілсеңіз, мамандығы өзге тараптан екен. Әуелі дене тәрбиесінің мұғалімі болған, шаңғы спортымен белсенді айналысқан. Әскери борышын өтеп келгеннен кейін жаттықтырушы болып еңбек еткен. Мүмкін қиындықтан қайыспау, жол-жөнекей кездескен бөгесінді бұзып-жарып, алға ұмтылу спортта қалыптасқан мінез бе екен?
Әуелі «Саян» шаруа қожалығын құрыпты. Малды өз төлінен өсіріп, қажетті техниканы жинақтаған, ескіні жамап-жасқаған. Төрт құбыласын тегістеген соң «Темірлан» жауапкершілігі шектеулі серіктестігін құрған. Бүгінгі босағасына береке біткен ұжымның алғашқы бастауы осылайша қалыптасқан. Кейін Ерлан Қинуарбекұлы істің көзін таба білген ілкімділігінің арқасында шаруасын мығымдай түскен. Игілігін ел көріп отыр. Серіктестік өнімдері сапасы жағынан жоғары бағаланады. Тұтынушылар тарапынан өкпе-наз айтылған емес. Шалғайдағы шағын ауылдың шырайын келтіріп отырған да осы. Жалғыз төрт түлік мал ғана емес, тың дала төсінде ақық дән де өсіреді. Егістік алқабы 45 мың гектарды құрайды. Кешегі кеңес заманындағы екі кеңшардың жері. Осыншама жерді өңдеу үшін қуатты техника, қажырлы жұмыс күші керек екендігі белгілі. Болашақтың жайын ойлаған шаруашылық басшысы ауыл шаруашылығына қажетті техниканы жүз пайыз жаңғыртқан.
«Темірлан» серіктестігі қазір бері қойғанда аудандағы, әрі қойғанда өңірдегі етек-жеңі кең пішілген ірі ауыл шаруашылығы кәсіпорны санатында. Серіктестік өз шаруасын ыждағаттаумен қатар, ауданның әлеуметтік-тұрмыстық жағдайының жақсаруына көп көмек көрсетті. Елді мекендердің жолын жөндеуге, білім мен мәдени нысандарып жаңғыртуға ат салысып келеді.
Биыл төрт бірдей инвестициялық жобаны қолға алып, жүзеге асырып жатыр. Егін шаруашылығында табысқа қол жеткізу үшін 340 гектар алқапты суармалы егістікке көшіру мақсатында итальяндық құрылғы сатып алған. Желілік элеваторға сапасы мықты түрік құрылғысын орнатқан.
Серіктестік табысқа қол жеткізумен қатар, өз ауылымен бірге тұтас ауданның да ахуалын жақсартуға септігін тигізіп келеді.
Ақмола облысы,
Жарқайың ауданы
