Сурет: elordainfo.kz
Ғылым және жоғары білім министрлігінің хабарлауынша, 9 желтоқсанда магистратураға білім гранттарын тағайындау конкурсына қатысу үшін құжат қабылдау басталады. Қабылдау 13 желтоқсанға дейін (қоса алғанда) жоғары оқу орындарының қабылдау комиссиялары, соның ішінде виртуалды қабылдау комиссиялары арқылы жүзеге асырылады. Яғни талапкерлер құжаттарын дәстүрлі және онлайн форматта тапсыра алады.
Магистратураға түсу үшін ғылыми-педагогикалық бағыт бойынша кемінде 75 балл, бейіндік бағыт бойынша аз дегенде 30 балл жинау қажет. Магистратурада оқуға арналған білім гранттары кешенді тестілеу нәтижелері бойынша конкурстық негізде тағайындалады. Конкурсқа қатысу үшін келесі құжаттарды тапсыру қажет: жеке куәліктің көшірмесі, жоғары білімі туралы құжат (диплом және қосымшасы); КТ сертификаты және шет тілін меңгергенін растайтын халықаралық сертификаттар (бар болған жағдайда). 075/у нысанындағы медициналық анықтаманы жоғары оқу орнына түскенде тапсырады. Құжаттарды тапсыру кезінде оқуға түсуші білім бағдарламаларының бір тобын және үш жоғары оқу орнын көрсетуге құқылы.
Магистратураға түсушілер осы жолы 4 мың мемлекеттік білім грантына үміткер бола алады. Магистратураға білім гранты иегерлерінің тізімі 25 желтоқсанға дейін Ғылым және жоғары білім министрлігі мен Ұлттық тестілеу орталығының ресми сайтында, әлеуметтік желілердегі парақшаларында жарияланады. Ал болашақ магистранттардың оқуға қабылдануы 26 желтоқсан мен 2025 жылдың 10 қаңтары аралығында жүргізіледі.
Ұлттық тестілеу орталығының дерегіне сүйенсек, жаздағы магистратураға тапсырғандардың орташа көрсеткіші ғылыми-педагогикалық бағытта 71 балл, бейіндік бағыт бойынша 24 балл болды. Ең жоғарысы 135 балды құрады. Сол кездегі тестілеу қорытындысында 38 қатысушының нәтижесі жойылды. Оның ішінде 25 тестіленуші смартфон, шпаргалка және басқа да тыйым салынған заттарды алып өтуге тырысқаны үшін тест тапсыру мүмкіндігінен айырылды. Кешенді тестілеу кезінде ережелерді бұзғаны үшін аудиториядан 12 адам шығарылып, олардың нәтижелері жойылды. Сондай-ақ тестілеу бейнежазбаларын қайта тексеру нәтижесінде 1 адамның балы жойылды. Бөгде тұлға анықталған жоқ. Республикалық апелляциялық комиссияға 5,5 мың өтініш, оның ішінде мазмұны бойынша 5,1 мың, техникалық себептерге байланысты 344 өтініш түсті. Апелляциялық комиссияның шешімімен 54 бірегей тест тапсырмасы қанағаттандырылды: мазмұны бойынша – 44, техникалық себептерге байланысты – 10 тапсырма. Осы жолы тапсырған талапкерлер де қорытындысымен келіспеген жағдайда апелляцияға бірден өтінім бере алады.
