Коллажды жасаған – Қонысбай ШЕЖІМБАЙ, «EQ»
Қолданыстағы заңнамаға сәйкес жұмыстан босатылған жұмысшылар міндетті әлеуметтік сақтандыру жүйесіне қатысу өтіліне, кейінгі 24 айдағы табысына байланысты 1 айдан 6 айға дейін жұмысынан айырылуы бойынша әлеуметтік төлем алады. Жоғалған кірістің 45%-ына дейінгі мөлшердегі бұл қаражат Мемлекеттік әлеуметтік сақтандыру қорының есебінен төленеді.
Төлем тағайындауға жұмыстан босатылған жұмысшыдан не талап етіледі? Жұмысшы алдымен eGov.kz порталына тіркелуі қажет. Кейін «Жұмысқа орналастыру және жұмыспен қамту» бөлімінде «Жұмыс іздеуші адамдарды тіркеу» қызметін таңдайды. Ізінше онлайн-қызметке тапсырыс беріп, барлық жолды толтырады. ЭЦҚ арқылы қол қойып, өтінімді жібереді. Араға күн салып, тұрғылықты жердегі мансап орталығы бос жұмыс орындарын ұсынады. Егер жұмыс табылмаса, 3 жұмыс күні ішінде қашықтан жұмыссыз мәртебесі беріледі. Қажет болған жағдайда мансап орталығының қызметкері қосымша ақпарат жинау мақсатында хабарласуы мүмкін. Бұл қызметті онлайн режімде Электрондық еңбек биржасы (enbek.kz) арқылы да алуға болады.
Жұмыссыз ретінде тіркелу туралы мәліметтер жарияланған соң, Еңбек министрлігінің ақпараттық жүйесі проактивті форматта мемлекеттік әлеуметтік сақтандыру қорынан төлем тағайындау жөніндегі қызмет көрсетуге келісу үшін мобильді телефонға SMS-хабарлама жібереді. Келіскен жағдайда SMS-хабарламаға жауап беру қажет. Төлем автоматты түрде тағайындалады.
Мемлекеттік әлеуметтік сақтандыру қорының қаражаты есебінен жұмыстан айырылған жағдайда тағайындалатын әлеуметтік төлем жұмыстан шығу себебіне қарамастан төленеді. Әлеуметтік төлем – жұмысынан айырылып, қайта жұмыс іздеуге кіріскен азаматтарды қолдаудың бір жолы.
