Елорда тұрғындары екі оркестрдің және Е.Рахмадиев атындағы мемлекеттік академиялық филармониясының Камералық хорының орындауында Нұрғиса Тілендиевтің қазақ музыкасының алтын қорына енген шығармаларын тыңдады. Сондай-ақ көрерменге ерекше шығармашылық эксперимент ұсынылып, көне қазақ халық аспаптарының үнімен қатар «Vivo per lei», «The Prayer», «Melodramma», «Remember», «She» және «Шиндлер тізімі» фильмінен композициялар орындалды.
Бұдан бөлек сахнада Қазақстанның еңбек сіңірген қайраткерлері Светлана Айтбаева мен Азамат Жылтыркөзов, халықаралық және республикалық байқаулардың лауреаттары Нұрғалым Аманбай, Фархат Кубиев, Толғанай Пазылақын, Ербол Тәжібаев өнер көрсетті. Сонымен қатар дәстүрлі әнші Өзгеріс Шерікбай, халықаралық байқаулардың лауреаты Фируза Рахметова көрерменге өз өнерін ұсынды.
Мәдени кешке Н.Тілендиев атындағы АФЭО «Отырар сазының» көркемдік жетекшісі және бас дирижері – Дінзухра Тілендиева, Н.Тілендиев атындағы АФЭО «Отырар сазы» оркестрінің дирижері – Жалғасбек Бегендіков, симфониялық оркестрдің дирижері Арман Жайым дирижерлік етті. Ал симфониялық оркестрдің көркемдік жетекшісі және бас дирижері – Абзал Мұхитдин, Камералық хордың көркемдік жетекшісі және бас дирижері – Гүлмира Құттыбадамова.
