Зауыт директоры Павел Саенконың айтуынша, өндірістің аяқтан тұруына «Даму» кәсіпкерлікті дамыту қорының өңірлік филиалы арқылы берілген 2,7 млрд теңге қолдау болған.
«Осы қаражатты өндіріс алаңдарын кеңейтуге жұмсадық. Оған кәсіпорын қаржысынан 1 млрд теңге қосып, Италиядан заманауи қондырғылар сатып алып, №2 цехты түгел жабдықтадық. Жабдықтар жеткізген компания жұмысшыларымызды оқытып берді. Заманауи жабдықтар мен жұмысшылар біліктілігінің артуы еңбек өнімділігін арттырды. Зауытта 100 жұмысшы екі ауысыммен жұмыс істейді Алдағы жылы 20 мың тонна металл құбыр мен бұйымдар шығару жоспарымызда бар», дейді Павел Павлович.
Жабдықтар мен қондырғылар Түркия мен Қытайдан әкелінген. Өндіріс алаңдары толық жабдықталып, жаңа цехтың №4 және №5-желілері іске қосылған соң, 3 ауысымдық жұмыс тәсіліне көшіп, тағы 200 адамды жұмысқа қабылдайды.
«Құбырларымызды негізінен отандық компаниялар сатып алады. Соңғы кезде Өзбекстаннан көп тапсырыс түсіп, сол жаққа жөнелтіп жатырмыз. Көп сұранысқа ие өніміміз – жылыжай қаңқасын тұрғызуға қажетті иілгіш темірлер. Көппәтерлі үйлердің жертөлесіне су және газ өткізгенде міндетті түрде металл құбырлар салынады. Апатты жағдайлардың алдын алу үшін адам тығыз қоныстанатын тұрғын үйлердің су не газ құбырын ортақ тарату желісіне пластик немесе металл пластик құбырлар салуға болмайды. Бұлар үлкен қысымға шыдамай, жарылып кетуі мүмкін. Сондықтан ең сенімдісі – өткізу қабілеті жоғары әрі берік металл құбырлар», дейді П. Саенко.
Металл құймалары түріндегі шикізат «Арселор Миттал Теміртау» компаниясынан жеткізіледі. Металл құймалары цехта түрлі қалыппен, түрлі өлшеммен кесіліп, цехтарға жөнелтіледі. Қазір өндіріс орнында шаруашылықта көп қолданылатын диаметрі 120 мм, 159 мм-лік, 10х10 см-лік құбырлар көптеп дайындалады. Тағы бір цехта өндіріске, ғимарат құрылысына пайдаланылатын диаметрі 120х120 см өлшемдегі тікбұрышты құбырлар да әзірленеді.
«Зауыттан әкелінген әртүрлі қалыңдықтағы құйманы қалыпқа салып, түрлі өлшемде кесеміз. Біз кесіп берген материалдан әртүрлі пішінде құбырлар шығарылады. Жабдықтар автоматтандырылған. Адам тек жұмыс барысын үздіксіз қадағалайды. Өте сирек жағдайда ғана қолмен жөндейміз. Қазір төртбұрышты, дөңгелек пішіндегі құбырлар дайындап жатырмыз. Жұмыс барысында еңбек қауіпсіздігі толық сақталады. Арнаулы киім, каскаларымыз бар. Жұмысым таңғы сағат 8-де басталып, кешкі 8-ге дейін созылады. Түнгі ауысымға басқа топ келеді», дейді жабдықтарды реттеуші Нұржан Тәжбенов.
«Даму» кәсіпкерлікті қолдау қоры АҚ-ның өңірлік филиалының директоры Айнагүл Байдәулетованың айтуынша, осы жылы Ақтөбе облысы бойынша 1 930 жоба мемлекеттік қолдауға ие болған. Соның бірі – осы Ақтөбе металл құбырлар зауыты.
Ақтөбе облысы
