АҚТӨБЕ. 1 мамыр. Ақтөбе облыстық ішкі істер департаментінің мұражайында Ұлы Жеңістің 70 жылдығына арналған игі шара өтті. Оған ардагерлер кеңесінің мүшелері мен департамент басшылары қатысты. Бұл туралы egemen.kz хабарлады.
Облыстық ішкі істер департаментінің бастығы, полиция полковнигі Махсудхан Аблазимов ардагерлерді алда келе жатқан Ұлы Жеңістің 70 жылдығымен жеке құрамның атынан құттықтады. Олардың ерліктері мен еңбектері үшін алғыс сезімін білдірді. Ұлы Отан соғысының төрт және еңбек майданының қырық екі ардагеріне Қазақстан Республикасы Президентінің Жарлығы негізінде «1941-1945 жылдардағы Ұлы Отан соғысындағы жеңістің 70 жылдығы» мерекелік медалін тапсырды. Сондай-ақ, Ұлы Отан соғысының ардагерлеріне 100 мың теңгеден және тылда еңбек еткен ардагерлерге 35 мың теңгеден ақшалай сыйлық ұсынды.
Салтанатты шараның соңында облыстық ішкі істер департаменті ғимаратының алдындағы алаңға ардагерлер өз қолдарымен ағаш көшеттерін отырғызып, аллеяны Ұлы Жеңістің 70 жылдығына арнап «Жеңіс аллеясы» деп атады.
Сатыбалды СӘУІРБАЙ.
Дерек, сурет: egemen.kz.
