Сенатор Амангелді Нұғманов Ақтөбе облысының әкімімен және өңірдің активімен кездесті. Кездесу барысында әкім сенаторға 2024 жылдың әлеуметтік-экономикалық қорытындылары, ағымдағы жұмыстар мен өзекті мәселелер туралы баяндады. Әсіресе автомобиль жолдарының жағдайы, экологиялық ахуал, әлеуметтік қызметтердің сапасы, инфрақұрылым және интернетке қолжетімділік мәселелері қозғалды.
«Президент халықтың шынайы мұқтажына назар аудару керектігін айтып отыр. Ауылдық аймақтарды нығайту, әлеуметтік және көлік инфрақұрылымын дамыту, аграрлық сектор мен жаңа технологияны қолдау – бұл бәріміз бірлесіп шешуге тиісті міндеттер», деді сенатор.
Сенат депутаттары Әли Бектаев, Мұрат Қадырбек және Алишер Сатвалдиев Түркістан облысы Мақтаарал ауданында жүзеге асып жатқан әлеуметтік және инфрақұрылымдық жобалардың барысымен танысты.
Президенттің «Әділетті мемлекет. Біртұтас ұлт. Берекелі қоғам» атты Жолдауында бастау алған «Жайлы мектеп» ұлттық жобасы аясында осы ауданда жаңа бес мектептің құрылысы жоспарланғаны туралы депутаттар хабардар болды. Сенаторлар Атакент ауылында салынып жатқан мектеп құрылыс алаңын аралады. 1500 орынға арналған бұл мектеп заманауи құрал-жабдықтармен, оның ішінде робототехника кабинеттерімен, кең жолақты интернетпен және зертханалармен жабдықталады. Бұл білім сапасын арттыруға және мұғалімдердің біліктілігін көтеруге мүмкіндік береді.
Депутат Ернұр Әйткенов Павлодар облысындағы Май аудандық мәслихатының депутаттарымен өңірдің әлеуметтік-экономикалық дамуының негізгі мәселелерін талқылады. Президент Қасым-Жомарт Тоқаевтың «Ана тілі» газетінде жарияланған сұхбаты талқылаудың басты тақырыбының бірі болды. Онда Мемлекет басшысы инфрақұрылым, тұрғын үй құрылысы және экономиканың негізгі салаларын дамытудағы 2024 жылғы жетістіктерді атап өткен болатын.
Ернұр Әйткенов коммуналдық инфрақұрылымды жаңартуды жалғастыру, жолдар мен тұрғын үйлер салу қажеттігін, сондай-ақ ауыл шаруашылығын қолдаудың маңыздылығына назар аударды.
Сенаттың Әлеуметтік-мәдени даму және ғылым комитетінің төрағасы Нұртөре Жүсіп А.Байтұрсынов атындағы Тіл білімі ғылыми-зерттеу институтында болды. Онда мекеме басшылығымен және қызметкерлерімен кездесіп, оның материалдық-техникалық базасымен танысты.
Нұртөре Жүсіп институт лингвистика, қазақ тілін сақтау және дамыту саласындағы зерттеулермен айналысатын Қазақстанның жетекші ғылыми мекемелерінің бірі екенін атап өтті.
«Жақында Президент Қасым-Жомарт Тоқаев белгілі басылым «Ана тілі» газетіне берген сұхбатында еліміздегі қазақ тілінің жай-күйі мен даму келешегі туралы мәселелерге жан-жақты тоқталды. Мемлекет басшысы қазақ тілінің болашағы қоғам өмірінің түрлі саласына қаншалықты терең енетініне байланысты екенін атап өтті. Алда ауқымды жұмыс күтіп тұр. Дегенмен, оның мән-маңызына деген сенім мен бүкіл мемлекеттік және қоғамдық институттардың белсенді қолдауы арқасында қазақ тілі еліміздің қазіргі әлемде үйлесімді дамуын қамтамасыз ететін ақиқатқа айналады. Қазақ тілін дамыту ұлттық бірегейлікті нығайтады. Президент пәрменін ескере отырып, институт осы маңызды және күрделі миссияда маңызды рөл атқарады деп санаймын. Өйткені, оның тіл саясаты, лексикография және орфография бойынша ғылыми зерттеулері мен жұмыстары еліміздің қазақ тілі мен мәдени ортасының қалыптасуы мен дамуына айтарлықтай әсер етеді», деді Нұртөре Жүсіп.
