Негізі сұхбатта күрделі және өткір мәселелер көтерілді. Оларға Президент тарапынан барынша ашық жауап беріліп, сырт айналып кеткен немесе бұлтарып қалған тақырып болмады. Сонымен қатар кейінгі кезде ел аузында жүрген, кейде жағдайды ушықтыруға тырысатын қауесеттерге де тоқталып, күдікті жәйттерді сейілте білді.
Өткен жылға баға беріп қана қоймай, мемлекеттік саясаттың көптеген аспектісіне, соның ішінде цифрландыру, кәсіпкерлікті дамыту, сыбайлас жемқорлық пен ұйымдасқан қылмысқа қарсы күрес, сыбайлас жемқорлыққа қарсы күрес мәселелеріне терең мән берді. Тіл саясаты және жастар, сондай-ақ еліміздің жаһандық державалармен және халықаралық ұйымдармен байланыстары туралы ашық айтылды.
Ұсынылып отырған реформалар саяси тоқырауды болдырмай, елдің тұрақты әлеуметтік-экономикалық дамуын қамтамасыз ететіні анық. Бұл Президенттің елімізде болып жатқан оқиғалар мен фактілерден және атқарылып жатқан шаралардан хабардарлығын, халықпен бірге екенін, бәріне зер салып, бақылап отыратынын, ең бастысы халықпен ашық диалогте екенін тағы да дәлелдеді.
Жалпы, біз қоғам жай сөзден, өсек-аяңнан, құр сөзден аулақ болуымыз керек. Істің, тірліктің адамы болудың уақыты келді деп есептейміз. Мемлекетшіл болу, патриот болу деген ұрандату емес, бұл – әркім өз ісін адал атқару, мемлекетке, қоғамға адал қызмет ету.
Әділетті, әділ мемлекет құруды басты ұстанымға айналдыру қажет. Бұл үшін ең алдымен заңдылық жұмыс істеуге тиіс. Осы туралы Президент әуел бастан айтып келеді.
Қазір депутаттар өңірлерде халықпен кездесулер өткізіп жатыр. Кездесулерде Президенттің саясатын, қабылданып жатқан заңдарды түсіндіру жұмыстары жүргізіледі. Осы кездесулер барысында Президенттің «Ana tili» басылымына берген сұхбаты да қызу талқыланды. Бұл кездесулерде жергілікті тұрғындар Мелекет басшысының саясатын, реформаларын, бастамаларын қолдайтынын жеткізіп жатыр. Әсіресе жергілікті атқарушы органдардың реформаларына көңілі толатынын, олардың бағытын дұрыс деп есептейтінін байқауға болады. Өңірді білетін азаматтардың қызметке тағайындалуы, мемлекеттік органдарды басқартуға дейін көтерілуі оң бастама ретінде қабылданды.
Мемлекет басшысы сұхбатында Парламент депутаттарының атқарып жатқан жұмысы мен қосып жатқан үлесін оң бағалайтынын айтты. Бұл жалпы Парламенттің Президент жүргізіп отырған реформалары мен бастамаларын заңнамалық тұрғыдан қамтамасыз етудегі берілген бағасы екені анық. Бүгінгі Парламент идеялар, озық ойлар, түрлі пікірлер мен көзқарастар талқылайтын, ортақ шешім қабылдайтын алаңға айналып отыр.
Бүгінде Қазақстанның дамуында маңызды қадамдар жасалып, елдің ішкі және сыртқы саяси бағыты дұрыс жолда екенін көруге болады. Инфрақұрылымның дамуы мен әлеуметтік-экономикалық бастамалар және саяси жаңғыру халықтың өмір сапасын жақсартуға бағытталған.
Әли БЕКТАЕВ,
Сенат депутаты
