Ел тарихының түгенделуіне өздерінің сүбелі еңбектерін қосып келе жатқан екі тарихшымыздың бұл жолғы Шымкент қаласына бет бұруы да жайдан-жай емес екен. М. Әуезов атындағы Оңтүстік Қазақстан университеті колледжіне келіп, оқу ордасының оқытушыларымен жүздесті.
Тарих ғылымы жайында тереңнен сөз қозғап, рухани әңгімелердің тиегін ағытқан Зиябек Қабылдинов мұндай кездесулер көбінесе университеттерде өтіп, колледждерде көп бола бермейтінін ескеріп, арнайы келіп тұрғанын да жасырмады. Сонымен қатар білікті мамандардың да көбінің алғашқы білім нәрін колледжден алғанын да айтты.
Бұл кездесудегі көңіл қуантар жағдайдың бірі – 1956–1982 жылдар аралығында Ш.Уәлиханов атындағы Тарих, археология және этнография институтында тарих ғылымының жандану жолында 26 жыл елеулі еңбек еткен Қазақ КСР Ғылым академиясының академигі және вице-президенті, Мемлекеттік сыйлықтың лауреаты, тарих ғылымдарының докторы, профессор Ақай Нүсіпбековтің 115 жылдығына орай дайындалған V томдық еңбектер жинағының тұсауы кесілді. Алматыдан келген қонақтарымыз бұл V томдыққа енген Ақай Нүсіпбековтің еңбектері жайында колледж ұжымына толық таныстырып, оқу орнына сыйға тартқандығы барша оқытушылар үшін бір мерейлі кездесу екендігі анық.
Әуезхан Шашаев колледж ұжымына түсінікті болуы үшін Ақай Нүсіпбековтің өміріне кеңінен тоқталып, бұл бес томдық еңбектің дайындалуы Ш.Уәлиханов атындағы Тарих және этнология институты ұжымының түгелдей жұмылуымен істелген шаруа екенін жеткізді. Сонымен қатар ел үшін еңбек еткен А.Нүсіпбековтей ерен тұлғаны ұлықтау айтулы институттың дәстүрлі жолы екенін айта келіп, 2019 жылы А.Нүсіпбеков атындағы мемориалды кабинет ашылғандығын, жыл өткен сайын ғалымның ғылыми мұраларын жаңа қырынан зерттеу жұмыстары мен конференциялар жиі болып тұратынын баяндады.
Кездесуде колледж ұжымын тағы бір серпілткен – Зиябек Қабылдиновтың құттықтау сөзі болды. Яғни Ш.Уәлиханов атындағы Тарих және этнология институты барлық облыспен, өңірмен тығыз байланыста бола отырып, әсіресе ел тарихының толықтануына, жандануына жүйелі жұмыс жасау үшін әр облыстардан институттың өкілдіктерін сайлайтындығын ұғындырды. Сондай-ақ Түркістан облысы, Шымкент қаласындағы өкілі ретінде тарих ғылымдарының докторы, профессор Сейдехан Әлібек тағайындалғанын хабарлап, қолына куәлік табыс етті.
Сөз соңында бүгінгі кездесуді қорыта отырып, әрі өзіне жүктелген міндетті ойдағыдай атқаратынына сенімділік білдірген колледж басшысы Сейдехан Әлібек «Тарихын білмеген ел – тамырсыз ағаш секілді» деген нақыл сөздің тегін айтылмағанын, сондықтан да әр саланың, әр адамның болсын, бәрінің де тарихқа қатысы бар екенін тілге тиек етті. Ел тарихын жинақтау жолында барлығымыздың, әсіресе тарихшы мамандардың жемісті жұмыс істеуі керек екенін, өзі басқарып отырған колледж ұжымының бұдан кейін іргелі институтпен жақын байланыста болып, жүйелі жұмыс жүргізетінін жеткізді.
Нұрлыбек Досыбай,
М.Әуезов атындағы ОҚУ колледжінің аға оқытушысы
