Алматы мен Минск арасына қатынайтын әуе рейсі ашылды

АСТАНА.1 мамыр. Беларусьтің Belavia әуе компаниясы Алматы мен Минск арасына қатынайтын тұрақты әуе рейсін іске қосты. Енді екі қала ортасында «Боинг» ұшағы жолаушылар тасымалдайтын болады. Бұл туралы bonus-travel.by хабарлады. Аталған жаңа рейстің бір артықшылығы, жолда жанармай құю үшін өзге аэропорттарға тоқтамайды. Belavia әуе компаниясы басшысының орынбасары Игорь Чергинец: «Бұл бағыттағы әуе тасымалы көптен бері халықтың сұранысына ие еді. Жалпы, біз Алматы-Минск бағытындағы әуе кемесі жолаушыларға сапалы қызмет көрсететініне сенімдіміз. Әзірге әуе қатынасы аптаның екі күнінде ғана жолаушылар тасымалдайтын болады»,–дейді. Ал Қазақстанның Беларусьтегі төтенше және өкілетті елшісі Ерғали Бөлегенов: «Әуе қатынасы екі ел үшін өте маңызды рөл атқарады. Қазақстан мен Беларусьтің арасындағы тауар айналымы 1 млрд. доллар. Бұл – әрине аз. Сондықтан да, біз осы әуе қатынасы арқылы тауар айналымын ұлғайтуды көздеп отырмыз. Алдағы уақытта Алматыға аталған елдің туристерін көптеп тартуды қолға аламыз», – деді. Айта кетейік, осы жылдың жазынан бастап Belavia әуе компаниясы Қазақстанның – Астана, Қарағанды, Қостанай, Павлодар және Алматы қалаларына тұрақты түрде қатынайтын әуе рейстерін іске қосатын болады. Талғат Райымбек. Дерек, сурет: bonus-travel.by.