Құзырлы органдар биыл Өскеменнің 19-шағын ауданындағы құрылысы жол ортада тоқтап қалған колледж ғимараты физика-математика бағытындағы Дарынды балаларға арналған мектеп-лицей-интернатына беріледі деп мәлімдеген. Алайда қаңыраған ғимараттың маңайында қыбыр еткен тіршілік жоқ. Еске салсақ, былтыр облыстың білім басқарамасы басшысының сол кездегі орынбасары Нұртуған Маратұлы 2025 жылы білім ордасына арналған ғимараттың құрылысы аяқталады деген. Құрылыс биыл аяқталуы үшін жұмыс былтыр басталуы керек еді.
«Мәселені шешудің бірден-бір жолы – Ілияс Есенберлин даңғылы бойындағы 880 орындық ғимаратты осы лицей-интернатқа беру. Ол алғашында колледж ретінде бой көтерген. Қазіргі таңда құрылысы тоқтап тұр. Қателеспесем, наурыз айында «ВК Инвест компани» мердігер компаниясы ол нысанды сатып алған. Бірақ құрылысы мектепке бағытталған. 2025 жылы аталған мердігер компания құрылысты аяқтайды. Қазір экспертизалық жұмыстар жүргізіліп жатыр. Бәрі зерттелген соң құрылысқа кіріседі», деп еді басқарма басшысының орынбасары 2023 жылы берген сұхбатында.
Одан бері жылдан асты. Дарынды балалар сол баяғы ескі мектепте білім алып, ыстық сусыз интернатта тұрып жатыр. Ал Президент техникалық мамандыққа көңіл бөлу керектігін бір емес, бірнеше қайтара айтқан. Ол сөзге құлақ асып отырған облыста қай басшы бар?
Біз көтерген бұл мәселе бір орында тұралап қалған соң жуықта облыстық білім басқармасына тағы да ресми сұрақ жолдағанбыз. Оның үстіне, алдыңғы жылғы берген мәліметтері сиырқұйымшақтанып кеткен. Бұл орайда БАҚ өкілдерінің мақсаты біреу: физика-математика бағытында оқып жүрген оқушылардың жайлы мектепте білім алуына септесу. Әйтпесе, қазіргі мектептің өзі де, интернаты да жаға ұстатарлықтай. Ол туралы «Egemen Qazaqstan» газетіне 2023 жылдың желтоқсанында тарқатып жазғанбыз. Одан бері ешқандай оң өзгеріс жоқ. Білім басқармасы жолдаған биылғы жауапқа үңілсек, «BK Инвест компани» мердігер компаниясы жобалау жұмыстарын жалғастырып, оны экспертизаға кіргізуге дайындап жатыр. Сонымен қатар жер учаскесін рәсімдеу жұмыстары да қолға алыныпты. Алайда құрылыстың нақты қашан басталып, қашан аяқталатыны жөнінде ақпарат жоқ. Соған қарағанда болашақ инженерлер мен техника тілін білетін мамандар жайлылықтан жұрдай интернатта тұрып, қалтарыстағы білім ошағында білім алуларын жалғастыра бермек.
Өскемен
