Суретті түсірген – Ақәділ Рысмахан
Облыс әкімдігінің білім басқармасы мен «Жамбыл облысы Азаматтық Альянсы» заңды тұлғалар бірлестігінің ұйытқы болуымен «Ой шебері» зияткерлік ойыны басталды. Іс-шараға барлық аудан мен облыс орталығы Тараз қаласындағы мектептердің оқушылары мен олардың жетекшілері жұмылдырылды. Ұйымдастырушылардың айтуынша, ауқымды жобаға кітапқұмар жастардан құралған 90 команда қатысып жатыр.
«Жергілікті қаламгерлердің шоқтығы биік шығармаларын жас буынның санасына сіңіру мақсатында ұйымдастырылған зияткерлік ойын 6 кезеңді қамтиды. Білім алушылар Шерхан Мұртазаның «Ай мен Айша», «Қызыл жебе», «Бір кем дүние», Бауыржан Момышұлының «Ұшқан ұя» секілді туындыларын, Күләш Ахметованың бірнеше өлең жинағын оқиды. Сондай-ақ Жамбыл облысынан шыққан өзге де ақын-жазушылардың шығармалары қамтылады. Білім алушылар оқыған кітаптарына қатысты нақты сұрақтарға жауап беріп, көркем шығармаларды оқығанын дәлелдеуі керек», дейді ұйымдастырушылар.
Демеушілердің қолдауымен өткізілетін әр кезеңнің жүлде қоры 1,2 миллион теңгені құрайды. Алғашқы кезеңде Мұхтар Әуезов атындағы мектеп-лицей (Сарысу ауданы), Нығметулла Киікбаев атындағы мектеп-лицей (Байзақ ауданы), Мұхтар Әуезов атындағы мектеп-лицей (Меркі ауданы) командалары үздіктер қатарынан көрініп, жеңімпаз атанды.
Ұйымдастырушылар келтірген дерекке сенсек, ауқымды жоба жыл бойы жалғасады. Ал демеушілердің қаржылай қолдауымен қолға алынған жобаның жылдық жүлде қоры 18,8 млн теңгені құрайды екен.
Тараз
