Жиында «Отандастар қоры» КеАҚ президенті Данияр Қадыров: «Ұлы дала» кітаптар сериясы жобасы 2023 жылы бастау алған. Содан бері шетелде тұратын қазақ қаламгерлерінің 20-дан астам кітабы жарық көрді. Бұл туындылар арнайы құрылған комиссияның сараптауы нәтижесінде таңдалды. Комиссия қарауына өткен жылы 100-ден астам әртүрлі жанрда жазылған шығармалар келіп түсіп, осылардан тоғызы таңдалып алынды. Сарапшылар кітаптың тәрбиелік және ұлттық бірегейлікті сақтаудағы маңызына мән береді. Сондай-ақ авторлардың жазу мәнері мен тіл байлығы да ескеріледі. Жоба аясында жарық көрген кітаптар еліміздің кітапханалары мен мектептеріне тегін таратылады», деді.
Сенат депутаты Ғалиасқар Сарыбаев та шығармалары жарық көрген авторларды құттықтады. «Жаһандану кезінде кез келген мемлекет өзінің тілін, дінін, ділін таза ұстап, бірегейлігін сақтап қалуға тырысады. Сол себепті мына жарық көрген кітаптар жерге түскен дән секілді. Бұл туындылар біреудің жүрегіне жетсе, болмысына дән болып егілсе, ертең мәуелі бәйтерек болып өседі. Сондай-ақ бұл кітаптар сирек кездесетін сөздер қазынасы іспетті», деді.
Жоба аясында моңғолиялық қаламгерлер Рысбек Зұрғанбайұлының «Қобданың қоңыр желі», Зүлкәпіл Мәулітұлының «Үркер ауып барады» атты жыр жинақтары, жазушы Ербақыт Нүсіпұлының «Кімді кінәларсың...» атты хикаяты, сондай-ақ өмірден өткен қаламгерлер Елеусіз Мұқамәдиұлының «Өрікті көл» повесі мен Баман Құрманханұлының «Айтағалы салт атты» туындысы, тәжікстандық Абдусаттар Нуралиевтің «Тәжікстандағы қазақтар» атты зерттеу еңбегі, өзбекстандық ағайындар: Жарасқан Мырзамұратов («Ақиқаттың дәмі ащы») пен Лала Жұманованың («Қарасу жырлары») шығармалары, РФ Алтай Республикасының тұрғыны Пионер Мұхтасыровтың «Ұрпағың үзілмесін» атты ғұмыр-баяндық эссесі баспадан шығыпты.
Жиын соңында шығарма авторлары мен туыстары «Отандастар қорына» ілтипат танытып, алғысын айтты. Атап айтқанда, кітабы жарық көрген автор Елеусіз Мұқамәдиұлының қарындасы, өзі де танымал сөз зергері Егеухан Мұқамәдиқызы: «Отандастар қоры» атынан шетте жүрген қаламгерлердің кітаптары жарық көргеніне өте ризамын. Менен екі жас үлкен Елеусіз ағам еңбекқор, елгезек еді. Бүгін сол кісі қайта тіріліп келгендей қуанып тұрмын. Ел іргесі тыныш болсын, халқымыз аман болсын!» десе, «Ақиқаттың дәмі ащы» кітабының авторы Жарасқан Мырзамұратов: «Осыған дейін кітаптарым Өзбекстанда жарық көрді. Атажұртымызбен әрдайым тығыз байланыстамыз. Жобаны ұйымдастырушы «Отандастар қоры» мен Жазушылар одағына айтар алғысым шексіз»,деді.
