Өткен ғасырдың 90-жылдары суретші Еркін Нұразхан мен ақын Жарасқан Әбдіраш сомдап шығарған ақын-жазушылар образы көңілге нық бекігені белгілі. Жарық көрген «Әзілің жарасса» жинағында сурет пен сөз астасып егіз ұғым үстегені тағы аян. Қазақ карикатурасын сөз еткенде Еркін Нұразханды, Айдарбек Ғазизды айналып өтпесіміз белгілі жайт. Біз жан әлеміне үңілгелі отырған кейіпкер де осы танымал суретшілердің шығармашылық шуағын бар жұлын-жүйкесімен сезінген Нұрбосын Оқасов. Қазіргі уақытта Семей қаласындағы Геодезия, картография және құрылыс жоғары колледжінде ұстаздық қызмет атқаратын оның өмір тынысы сурет болса, соның ішінде кейіпкерінің кескін-келбетін келістіре кестелейтіні карикатура.
Нұрбосын Серікқазыұлы 1982 жылы мектепті бітіре сала сурет, сызу және еңбек пәнінің мұғалімі деген мамандыққа түсу мүмкіндігіне қол жеткізе алмай, ауылына қайтады. Сол жылы аудан орталығы Ақсуат ауылындағы көркемсурет шеберханасында бас суретшінің көмекшісі болып жұмыс істеді. Осы кезеңде өзі қызығатын, алайда қыр-сырын терең ұғына қоймайтын әлемге шым батты. Кәсіби суретті меңгерген мамандардың ізін басып, білгенін көңілге тоқып, ізденіп әжептәуір шыңдала түсті. Отан алдындағы борышын өтеп келгеннен кейін 1992 жылы Семейдегі Н.Крупская атындағы педагогикалық институттың көркемсурет факультетін бітіріп, кәсіби маман ретінде еңбек жолын техникалық және кәсіптік білім саласынан бастады. Содан бері 33 жыл бойы арман-аңсары адастырмай, қылқаламның құдіретіне терең бойлады. Көбіне табиғат лирикасының көркін келістіріп картина салып жүргенімен, карикатураны ұдайы серік етіп келеді. Басында құрбы-құрдастарына қалжыңдап, солардың мінез-құлқын астарлап сурет сала бастады. Бірді-екілі шығармасын атақты суретші Еркін Нұразхан ағасының алдына тосып, ақ батасын алды.
«Жалпы алғанда, әзіл суреттер адамның ішкі жан дүниесін, оның басқа да жақсы қасиеттерін әйгілеп тұрады. Өз кейіпкеріңнің келбетін келістіру үшін оны жан-жақты зерттеуің керек. Бет әлпетін, атқаратын қызметін, мінез-құлқын, қимыл-қозғалысын бақылап, кемшілігін көріп, артықшылығын аңдаған дұрыс. Шынын айту керек, көбінесе бет-пішінінде айрықша белгілері бар жандардың суретін салған оңайға түседі», дейді суретші.
Суретші Нұрбосын Оқасовтың алғашқы суреттері 90-жылдардың аяғында көпшілік арасына тарай бастады. Оқу орнында жүргенде қатарластарымен әзілдесіп, бір-бірінің бет әлпетін әзілге айналдыратыны суретшінің шығармашылығын шыңдай түсті. Осыдан екі-үш жыл бұрын сыныптастарымен кездесіп, ерекше сезімге бөленген шығармашылық иесі құрдастарының кескін-келбетіне жылдар салған белгіні көріп, ой қамап, қылқаламына қол созды. Соның әсерінен туған бірнеше суретті айналасы жылы қабылдапты.
Суретші карикатурадан бөлек портреттерді салуға да құмар. Пейзаждар салуды жаны қалайтын суретші оған көп уақыт керек екенін айтады. Суретші қалай болғанда да өзінің көңіліне жақын суреттер салып, келешекте кең көлемді көрмесін ұйымдастырғысы келеді. Сырлы суреттер сериясын салу үшін көп еңбек пен аздаған еркіндіктің керек екенін айтады. Ол өзінің шарждары мен күлкі үйіретін карикатураларына «Қарындаштар қалжыңы» деп ат қойыпты. Шын мәнінде, жора-жолдастар арасында әзіл-оспақ арқылы басталған бұл суреттер бүгінде үлкен өнердің бастау бұлағындай көрерменін баурап келеді.
Семей
