Фото: primeminister.kz
Баяндамашының айтуынша 217 жайлы және 200 тірек мектептен тұратын үздік білім ұяларының желісі құрылып жатыр. Негізгі міндет – озық тәжірибені тарату арқылы еліміздің барлық жалпы білім беру мектептерінде білім сапасын кезең-кезеңмен теңестіру.
«Биыл 10 жетекші технологиялық колледж құрылатын болады. Олар басқа да кәсіптік білім беру ұйымдары үшін тірек ресурстық орталықтарына айналады.
Бүгінде Қазақстанда шетелдік жоғары оқу орындарының 23 филиалы жұмыс істеп жатыр, олардың 5-і өткен жылы ашылды. Биыл тағы 11 филиал ашамыз», деді Олжас Бектенов.
Премьер-Министрдің сөзінше университеттік ғылымды дамыту және оны коммерцияландыру ісіне назар аударылып отыр. Сәтбаев университетінде Қазақмыс корпорациясының тапсырысы бойынша таза селен алудың жаңа тәсілі әзірленді. Ол медицина, электроника және басқа да жоғары технологиялық салаларда кеңінен қолданылып жатыр.
«NU Университетінің базасында тірек-қимыл жүйесі зақымданған адамдарды оңалтуға арналған экзоскелеттер өндірісі жолға қойылды. Қажетті сертификаттарды алғаннан кейін біз өндірушіні Денсаулық сақтау министрлігі тарапынан кепілдік берілген тапсырыстармен қамтамасыз етеміз», деді Үкімет басшысы.
