![Өндірісте оқыс жағдай азайды](/media/2025/01/29/travma-na-rabote.jpg)
Еңбек және халықты әлеуметтік қорғау министрлігі Мемлекеттік еңбек инспекциясы комитетінің мәліметінше, былтыр өндіріс орындарындағы жарақат алу дерегі 2023 жылмен салыстырғанда 4,5%-ға төмендеген. Дегенмен еліміздің өндірістік аймақтарында жұмыскерлердің жарақат алу оқиғасы жиі тіркеледі. Мәселен, Қарағанды облысында – 159, Шығыс Қазақстан облысында – 124, Павлодар облысында – 112, Абай облысында – 101, Қостанай облысында 91 адам зардап шеккен. Сондай-ақ Алматы қаласында 116 адам жұмыс кезінде түрлі жарақат алған. Әсіресе тау-кен металлургия өндіретін өнеркәсіптерде (18,3%), одан кейін құрылыс саласында (10,1%.) жұмыскерлердің оқыс оқиғаға ұшырау фактісі жиі тіркелген.
Қызметкерлердің жұмыс үстінде арандауының басым көпшілігі өндірістегі жұмыстың тиісті деңгейде ұйымдастырылмауы (35,5%), жапа шегушінің өрескел қамсыздығы (31%), жол қозғалысы ережелерінің бұзылуы (8,2%), еңбек қауіпсіздігі, еңбекті қорғау ережелерін сақтамаудан (7,6%) туындаған.
Қауіпсіз еңбек жағдайын қалыптастырып, өндірістегі жарақатты азайту – Үкімет пен Еңбек және халықты әлеуметтік қорғау министрлігінің негізгі міндеттерінің бірі. Бес жылда мемлекеттік органдар мен жұмыс берушілердің еңбекті қорғауға қатысты жүзеге асырған кешенді шаралардың нәтижесінде, азаматтардың өндірісте жарақат алу деңгейі 6,3%-ға төмендеді.
Профилактика мен бұзушылықты алдын алу мақсатында еліміздің 3262 кәсіпорнына қауіпсіздік пен еңбекті қорғау стандарттары енгізілді. 2019 жылдан бастап министрлік «Нөлдік жарақат – Vision Zero» тұжырымдамасын жетілдіруге айрықша назар аударып отыр. Бұл тұжырым 605 кәсіпорында іске қосылған.
Құрылыс нысандарында бас мердігердің еңбек қауіпсіздігі мәселелері жөнінде барлық қосалқы мердігерлерге жауапкершілік пен бақылауды күшейтетін модель енгізу қолға алынып, 318 кәсіпорында іске қосылды. Жұмыс берушілерге еңбекті қорғау талаптарының сақталуын өзін-өзі тексеруден өтуге мүмкіндік беретін «Онлайн еңбек консультанты» электрондық сервисі де бар. Сервисті бүгінге дейін 42 985 жұмыс беруші пайдаланған.