Суретті түсірген – Александр МАРЧЕНКО
Футеровка – резеңкелі-металды төсем. Әсіресе мұны тау-кен байыту, химия өнеркәсібі өз құрылғыларына қолданады. Кәсіпорын Германия, Италия, АҚШ, Жапония, Испания өндірушілерінің заманауи жабдықтарымен әлеуетін арттырып, жоғары сапа стандарттарына сәйкес өнім шығарады. Сонымен қатар болат, шойын, алюминий, қоладан жасалған бұйымдар үшін кез келген күрделіліктегі фрезерлік жұмыстарды атқарады. Былтыр зауыт Орталық Азиядағы жалғыз «Okuma» фрезерлік өңдеу орталығын іске қосты. «Okuma» – металл өңдеудің күрделі операцияларын орындауға арналған жоғары технологиялық жабдық. Бұл жүйе авиация, автомобиль, энергетика және машина жасау сияқты әртарапты саланың сұранысын өтейді. «Okuma» станоктары жоғары геометриялық дәлдік пен «дірілді» азайтуды қамтамасыз етіп жасалған.
Кәсіпорын Сарыарқа арнайы экономикалық аумағында орналасқан. Жалпы ауданы 500 гектардан асатын бұл өндірістік алқапта инвесторлар үшін логистикалық, салықтық және кедендік жеңілдіктер қарастырылған. Мұндай мүмкіндіктерді пайдалану арқылы «Polymet Solutions Corporation» өз өндірісін кеңейтіп қана қоймай, өңірдің экономикалық әлеуетін арттырып отыр.
– Біз өнімнің беріктігі мен өміршеңдігін басты орынға қоямыз. Жоспарымыздың бірі – экспорттық нарықты кеңейту болса, екіншісі – өнім түрлерін арттыру. Резеңке металмен қоса биыл шойын өнімдерін де шығарсақ дейміз. Сол себепті, экономикалық аумақтан қосымша 10 гектар жер алдық. Құрылысты желтоқсан айында бастадық, – дейді «Polymet Solutions Corporation» ЖШС бас директоры Қуандық Қазанғапов.
Бұқар жырау ауданындағы осы өндіріс зауыты биылдан бастап резеңке мен пластмас бұйымдары түрлерінің тізбесін ұлғайтпақшы. Кәсіпорын қазірдің өзінде дамудың жаңа сатысына көтерілген. Мұнда негізінен кен байыту фабрикаларына қажетті диірмендерге қапталатын резеңке жабдықтар өндіріледі. Мұнсыз диірмен атаулы жұмыс істемейді. Өніміне елдің түпкір-түпкірінен сұраныс жоғары. Әсіресе «Kazakhmys», «KAZ Minerals», «Алтыналмас», «Kazzinc» секілді компаниялар фабрикасындағы диірмендерге бұл өнім ауадай қажет. Бірегей өнім Ресейге де экспортталады. Биылдан бастап Болгарияға жөнелтіледі деген жоспар бар. Қырғызстан, Моңғолия мемлекеттерімен тиісті келіссөз жүргізіліп жатыр.
Зауыттың басты артықшылығы – білікті мамандар шоғыры мен қуатты технологиялық база. Өндірістің кеңеюі тек өнім көлемінің өсуімен есептелмейді. Жаңа технологияларды кәдеге жарату да – маңызды міндет. Компанияның бас директоры Қуандық Қазанғапов осылай дейді.
Өркен жайған өндіріс ошағында 75 адам еңбек етіп жүр. Жаңа цех іске қосылған соң тағы 150 адам жұмысқа қабылданады. Зауытта еңбек адамына әлеуметтік қолдау жан-жақты көрсетілген. Сыйақысы да бар. Арнаулы тасымалдау көлігі мен тегін түскі ас қарастырылған. Арғы жылы да, өткен жылы да үздік қызметкерлерге шетелге саяхатқа жолдама берілген.
«Өнім өндіру үшін шикізатты негізінен Қытай, Корея, Малайзия, Вьетнам мемлекеттерінен аламыз. Негізгі шикізат түрі – каучук. Каучуксіз шикі резеңке өндірілмейді. Химиялық шикізат көршілес Ресейден тасымалданады. Қосымша шикізат түрлері Еуропа елдерінен әкелінеді. Металл бұйымдарына келсек, негізінен «Hardox» сынды сапалы металл түрі Швеция елінен тасымалданады. Зауыт қызметкерлері Стокгольм қаласына барып, ондағы өндіріс ошақтарымен тікелей танысып қайтқан. Ол елмен тығыз қарым-қатынас орнатылған. Өзге керек-жарақ ел ішінен табылады. Отандық шикізат көлемі 70 пайызды құрап отыр. Кен байыту саласында жаңа диірмендер қолданысқа енгізілді. Осыған орай қажетті резеңке жабдығын дер кезінде шығару маңызға ие», дейді зауыттың өндіріс жөніндегі директоры Галина Харасова.
Қарағанды облысы
