Керек дерекке жүгінсек, мөржүзік – билік үшін маңызды нышанның бірі болған. Сан түрлі ою-өрнекпен әдіптелген жәдігерлердегі бейнелердің әртүрлі мағынасы, мәні бар. Ежелгі түркілердің таным-түсінігенде мөржүзік киелі металл саналатын күмістен жасалады екен. Қасиетті құндылыққа телінген жәдігердің бірі облыстық тарихи-өлкетану музейінің қорында сақтаулы тұр.
«Біздің музейде әр ғасырдың куәсіндей болған құнды жәдігерлер жеткілікті. Тарихи дерекке жүгінсек, мөржүзік байырғы түркілердің танымында аспан металы саналатын күміспен әдіптеледі екен. Мамандардың айтуынша, жәдігерді сақтауға арналған арнайы ағаш қорап бар көрінеді. Олар арқардың мүйізінен жасалған деседі. Мөржүзіктердің басым көпшілігінде араб тіліндегі сөздер жазылған. Мұның бәрі сол кезеңдегі таным мен тарихтан, діни ұстаным мен дәстүрден сыр шертіп тұр деп пайымдауға болады», дейді облыстық тарихи-өлкетану музейінің қызметкері Лаура Байтұрсынова.
Музей маманының айтуынша, қорда сақтаулы тұрған құнды жәдігердің көлемі 3 сантиметрді құрайды. Пішіні төртбұрыш тәрізді мөржүзік музейге 1974 жылы табысталыпты. Тараз қаласының тұрғындарының бірі жеке жер учаскесін қазып жатқан кезде мөржүзікті тауып алған. Ол жәдігерді өз үйінде сақтамай, облыстық тарихи-өлкетану музейінің қорына тапсыруды жөн деп тапқан көрінеді.
Тараз
