Коллажды жасаған – Зәуреш СМАҒҰЛ, «EQ»
Әділет министрлігі өкілінің айтуына қарағанда, министрлік ЖИ арқылы бұқараның өмір сүруін жеңілдететін бірнеше жоба әзірлеген. Министрлік аталған жобаларды іске асыру мақсатында еліміздегі университеттермен бірігіп, жұмыс тобын құрған. Сондай-ақ спикер алдағы уақытта ІТ саласының кәсіпкерлерімен де ынтымақтаса жұмыс істеуге дайын екенін жеткізді.
– Қазіргі уақытта азаматтарға заңдық тұрғыда тәулік бойы кеңес беретін «Е-Zan Komegi» мобильді қосымшасының «чат-боты» әзірленіп жатыр. Осы жоба арқылы біз халықтың құқықтық сауатын арттырып, олардың кез келген сұрағына дер кезінде жауап беру мүмкіндігіне ие боламыз. Мәселен, біз жоспарлаған жобалар толықтай іске қосылғанда азаматтар құқықтық көмекті, яғни заңдық кеңесті үйінде отырып-ақ ала алады, – деді вице-министр.
Спикер «Е-Zan Komegi» мобильді қосымшасы адвокаттар мен заңгерлердің жұмысын автоматтандырып, онлайн кеңес беру, қоңырауларды қабылдау, кездесу уақытын белгілеу, заң қызметтерінің түпнұсқалығын тексеру секілді жұмыстарды атқара алатынын, бұл жұмыс әрдайым жетілдіріліп отыратынын тілге тиек етті. Болашақта Әділет министрлігі жылжымайтын мүліктерді рәсімдеу қызметін де ЖИ арқылы онлайн жасауға көшеді.
– Біз бұған дейін сенімхаттарды рәсімдейтін «Enotary» жобасын іске қостық. Екі жыл ішінде 67 490 сенімхат рәсімделіп, жүйе жақсы жұмыс істеді. Тұтынушылар тарапынан ешқандай арыз-шағым тіркелген жоқ. Енді осы жоба аясында жылжымайтын мүлікті сату, ипотека рәсімдеу секілді бірнеше қызметті онлайн режімге ауыстырамыз. Азаматтарымыз шетелде жүріп те үйлерін сата алатын болады. Ал ипотека рәсімдеу үшін банкке 10-15 рет барудың қажеті болмайды, – деді спикер.
Сондай-ақ вице-министр «Zanbar» және «IPrav» қосымшаларында адвокаттар мен заң кеңесшілерінің рейтингі бар екенін түсіндіріп, ҚазҰТЗУ-мен бірлесіп заң клиникаларын ашатынын, ол жүйеде жасанды интеллект емес, заңгерлердің өзі отыратынын, кез келген азаматтың олардан кеңес алуына болатынын жеткізді.
– Біздің басты міндетіміз – азаматтардың құқықтық қорғалуы. Әрине, елдегі барлық адамның сұрақтарына жауап беретін адвокат пен заң кеңесшісі мамандарын табу қиын. Сондықтан да тұрғындар тарапынан көп қойылатын сұрақтарға ЖИ және мобильді қосымшалар арқылы жауап беру тиімді болады. Министрлік алдағы уақытта осы бағыттағы жұмыстарды да жандандыра береді, – деді Бекболат Серікұлы.
Вице-министр бұқаралық ақпарат құралдары өкілдеріне 2024 жылы қолданысқа енген «Робот сот орындаушы» жобасының да нәтижелі жұмыс істеп жатқанын жеткізіп, нақты деректерді мысалға келтірді.
– Бізге бұрын сот орындаушыларға қатысты шағым көп түсетін. Мәселен, бұрын жүргізушілер «Сергек» камерасына түсіп қалғанын сот орындаушы әкімшілік айыппұлды өндіруге келгенде ғана біліп, айыппұлды бір, сот орындаушының 25 пайыздық қызметін екі төлеуші еді. Қазір біз ІТ технологияның көмегімен смс-хаттар жолдайтын жүйеге қол жеткіздік. Яғни айыппұл өндіру жұмысын «робот сот орындаушы» тегін істейді. Нәтижесінде, 2024 жылдың тамыз айынан бүгінге дейін 454 мың өндірістік іс қозғалып (9,6 млрд теңге сомасына), халықтың қалтасындағы қаражаттан 551 млн теңге үнемделді, – деді вице-министр.
