Күні кеше Түркістан қаласының әкімі Әзімбек Пазылбекұлы әлемнің түрлі елдеріндегі қолөнершілер мен қолөнерді біріктіруші – «World Craft Council» халықаралық ұйымының сарапшыларымен кездесті. Түркістанға арнайы келген Дүниежүзілік қолөнер кеңесінің Азия-Тынық мұхиты аймағы бойынша вице-президенті Айдархан Калиев пен сарапшылары үндістандық Сохан Кумар Джа, түркиялық Махоотчиан Ялда, Дүниежүзілік қолөнер кеңесінің Оңтүстік-Шығыс Азия аймағы бойынша вице-президенті және сарапшысы Ле Ба Нгок қаланың қолөнер саласының дамуымен танысып, тәжірибелерімен бөлісті. Сонымен қатар «қолөнершілер қаласы» мәртебесіне ие болуы үшін атқарылатын жұмыс бағыттары мен саладағы ынтымақтастық жайы талқыланды.
Әзімбек Пазылбекұлы сан ғасырлық тарихы бар, мәдениеті мен өнері ұштасқан қасиетті шаһар туралы баяндап, «Халықаралық қолөнершілер қаласы» мәртебесін алудың маңызына тоқталды. «Ұлы Жібек жолының маңызды орталықтарының бірі болып, ежелден қолөнердің дамуына үлкен үлес қосқан Түркістан аталған мәртебені алуға ниетті. Бүгінде қаламыздың қолөнер саласы өзінің терең тамыры мен ұлттық ерекшеліктерін сақтай отырып, заманауи үрдістермен үйлесімді дамып келеді. Түркістандық шеберлер жасаған керамикалық бұйымдар өздерінің әсемдігімен, нақышты өрнектерімен және сапасымен ерекшеленеді. Алдағы уақытта қолөнершілерді қолдауға бағытталған үлкен жобаларымыз бар», деді қала әкімі.
Сондай-ақ басқосуда Дүниежүзілік қолөнер кеңесінің Азия-Тынық мұхиты аймағы бойынша вице-президенті Айдархан Калиев қала әкіміне алғыс айтып, Түркістанмен ынтымақтастықты дамытуға дайын екенін жеткізді. Түркістанға «Халықаралық қолөнершілер қаласы» мәртебесін алу ортақ мақсат екенін жеткізіп, осы жолда бірлесіп жұмыс істеуге ниет білдірді.
