Рахымжан Қошқарбаевқа Алматыда мемориалды тақта орнатылды

АЛМАТЫ. 4 мамыр. «Алматы» қонақ үйінің фасадында Рейхстаг ғимаратына Ту тіккен қазақ батыры Рахымжан Қошқарбаевқа арналған мемориалды тақта қойылды. Соғыс ардагері 20 жылдан астам осы қонақ үйдің директоры қызметін атқарған. Бұл туралы inform.kz хабарлады. Митингіге қатысушылар тарихқа бір сәт терең үңіліп, Рахымжан Қошқарбаев жайлы естеліктер айтты. Оның майдан даласындағы ерлігін бүгінгі ұрпаққа үлгі-өнеге ретінде баяндады. 150-ші атқыштар дивизиясының жауынгерлік іс-қимыл әрекеттерінің кітабында «1945 жылы, 30 сәуір күнгі 14 сағат 25 минут кезінде лейтенант Рахымжан Қошқарбаев пен қатардағы жауынгер Григорий Булатов ғимараттың орталық бөлігіне жер бауырлап барып, кіре-беріс баспалдаққа Қызыл туды тікті»,–деп жазылған. Сол кезде өлімге бас тіккен қос жауынгердің ерлігі ерекше ескеріліп, екеуі де Кеңес Одағының Батырғы атағына ұсынылған. Алайда, лейтенант Рахымжан Қошқарбаев Қызыл Ту орденімен марапатталды. Тарихи шындық Қазақстан Тәуелсіздік алғаннан кейін ғана ғұмырлық салтанат құрды. Рейхстагқа Ту тіккен қазақ батырына 1999 жылы Қазақстан Республикасының Президенті Нұрсұлтан Назарбаевтың Жарлығымен «Халық қаһарманы» атағы берілді. Талғат Сүйінбай. Дерек, сурет: inform.kz.