ЮНЕСКО деңгейінде мойындалған әйгілі әнші-композитор Анна Германды бұрынғы Жамбыл қаласынан бөліп қарауға болмайды. Әлем бас иген ән періштесінің өзі байырғы Жамбыл шаһарын «менің қалам, мен осында мектеп табалдырығын аттағанмын» деп атағаны есімізде. Тағдырдың жазуымен бала күнінің бірнеше жылын Жамбыл қаласында өткізген әншінің көне шаһарға деген құрметі бөлек болған.
Облыстық тарихи-өлкетану музейінде әйгілі әншінің бірнеше бұйымы сақталған. Солардың бірі – тараздық Зейтуна Скрипаченкоға Анна Герман сыйға тартқан моншақ. Моншақты Зейтунаның қызы Галима он жылдан астам уақыт бұрын музейге тапсырыпты.
«Бұл моншақты Анна Герман 1979 жылғы өнер сапарында мейрамханадағы жас жұмысшыға сыйлапты. Тіпті ол кісіні әйгілі әнші поляк тілінде «Зося» деп атаған көрінеді. Зейтуна бұл бұйымды ұзақ жыл бойы өз отбасында сақтапты. 2013 жылы оның қызы Галима құнды бұйымды музей қорына табыстады. Осылайша, біздің музейдегі құндылықтар қатары әйгілі әншінің моншағымен толықты», дейді облыстық тарихи-өлкетану музейінің қызметкері Лаура Байтұрсынова.
Жалпы, облыстық тарихи-өлкетану музейінің қорында атақты әншінің бұйымдарынан жасақталған арнайы витрина бар. Музейге келушілер тарихи жәдігерлерден бөлек, тағдырдың жазуымен бірнеше жыл Жамбыл қаласында тұрған әйгілі әншінің бұйымдарын да аса қызығушылықпен тамашалайды.
Тараз
