Қарым-қатынастар дами түспек

Қазақстан Республикасы дәстүрлі түрде Омбы облысымен негізгі шетелдік әріптес, соның ішінде инвестициялық ынтымақтастық тұрғысында да шынайы әріптес болып табылады. Қазақстанмен арадағы айналым өткен жылы шамамен 100 миллион АҚШ долларын құрады. 2015 жыл Еуразиялық эко­номикалық одақтың құрылуы­мен ерекшеленіп отыр. Мұ­ның өзі біздің одан арғы өзара байланыстарымыздың бо­лашағын барынша айқын­дай түседі. Еуразиялық интегра­цияның дамуы екіжақты өзара тиімді байланыстардың жаңа­дан серпін алуына ықпал етпек. Қазіргі сатыда экономиканы күшейту, сауда-эконо­микалық байланыс­тарды терең­дету, инвестиция­лық ын­тымақтастықты ұлғайту және сонымен бірге, халықтың әл-ауқатының жалпы деңгейін арттыру сияқты өңіраралық әріптестікті нығайтудың көп­теген жемістерін көріп отырмыз. Сөз жоқ, өңіраралық ынты­­мақтастықта сауда-эко­номикалық қарым-қатына­с­тардың маңызы зор. Дегенмен, интеграцияның қазіргі жағдайы бірлескен кәсіпорындар құру сияқты өзара байланыстардың неғұрлым терең формаларына көшу қажеттігін көрсетеді. Сол сияқты, бірлескен инвестициялық жобаларды жүзе­ге асырудың да келешегі үлкен. Сондықтан бұдан арғы жерде де Омбы облысының Қазақстан Республикасымен инвестициялық ынтымақтастығы барған сайын күшейе түсетін болады. Бізде екіжақты қарым-қаты­настар жақсы қалыптасқан. Өткен жылы Омбы облысының губернаторы Виктор Назаров Павлодар облысының әкімі Қанат Бозымбаевпен кездесті. Биылғы жылдың басында Солтүстік Қазақстан облысы әкімімен кездесу жоспарланып отыр. Осындай кездесулер барысында екі елдің бизнес қауымдастықтары ара­сындағы байланыстар орнығып, олар кеңейе түседі. Қазіргідей рубль бағамының төмендеуі жағдайында қарым-қатынастар маңызы бұрынғыдан да арта түс­пек. Өйткені, отандық, яғни ресей­лік өнім қазақстандық өнімге қарағанда анағұрлым бәсекеге қабілетті бола түсуде. Демек, Қа­зақ­станға шығарылатын экспорт көлемі де арта түсетін болады. Вадим ЧЕЧЕНКО, Ресейдегі Омбы облысы­ның экономика министрі. Ресей Федерациясы.