Жол саласының сапасын қадағалауға жауапты бірден-бір мекеме – Жол активтерінің ұлттық сапа орталығы. Жауапты мекеменің негізгі міндетіне жол салу, реконструкциялау, жөндеу, күтіп ұстау жұмысын қадағалау кіреді. Яғни салынар жолдың қатпарына, төселіп жатқан жол қабатына сараптама жасайды. Әр өңірде филиалы бар мекемедегі инспекторлар жыл сайын 17 мың шақырымнан астам халықаралық, республикалық, облыстық маңызы бар жолдарға диагностика жүргізеді. Жол-құрылыс материалдарына 220 түрлі жан-жақты зертханалық зерттеу жасалады. Орталықтың осыншама сын тезінен сәтті өтіп, тәмамдалған сапалы жол әлбетте, сапар жүгін жеңілдетеді.
Сол себепті құрылысқа қажетті материал да, тәжірибелі маман да – жолға кепіл. Жол активтері ұлттық сапа орталығының Қарағанды облысындағы филиалының жол инженері Әсел Хасенова – жылжымалы жол зертханасы арқылы өңірдегі жол саласына елеулі үлес қосып жүрген маман.
Жылжымалы зертханада жолды тексеруге қажеттінің бәрі бар: жол датчигі, геометриялық параметрлерді өлшеу жүйесі, тегістікті, көлденең тегістікті өлшеуге арналған жүйе, бейнежазба, GPS, мұнымен қоса ақаулардың сызықтық өлшемдеріне дейін өлшейтін құрылғы. Мұншама технологияның тілін терең түсінген бірегей инженер – ұжымында беделді маман.
Жалпы, жол құрылысы саласында маман тапшылығы деген мәселе өте өзекті болып отыр. Жол салып жатқан мердігер компанияларда зертхана меңгерушілері мен жол-құрылыс материалдарының инженерлері жетіспейді. Мұнымен қоса асфальт төсеуші, жол тегістейтін техника, бульдозер мен автогрейдер операторлары тапшы. Білікті механизаторлар, геодезия, картограф мамандар, метеорологтер мен механиктердің жоқтығы жұмыс қарқынын тежейді. Сол тұрғыда орталықтың қызметкерлері бос жұмыс орны жәрмеңкелерін қалт жібермей, қатысады. Колледж, университет түлектерімен кездесіп жастарды жұмысқа тартады. Жол саласына қызығып келгендерді Әсел секілді жетекші инженер қуана қарсы алып, білгенімен бөлісіп, технологияның түрлі тәсілін үйретеді. Сөйтіп, саладағы білікті маман саны жыл өткен сайын көбейіп келеді.
Жетекші сарапшы Әсел қазіргі қызметіне дейін түрлі салада қызмет атқарды. Алматыдағы Халық шаруашылығы университетін қаржыгер мамандығы бойынша үздік дипломмен тәмамдады. Содан өзінің өмірлік жарын жолықтырып, Қарағандыға қоныс аударды. Қалалық тергеу изоляторының есеп бөліміне жұмысқа орналасты. Осында қызмет ете жүріп басқа жұмысқа ауысуды ойластырады. Сол кезде қайын атасы Қаражал қаласындағы жолға жауапты мекемені басқаратын еді. Атасы ақыл салып, нұсқау көрсеткен соң «Қазавтожол» мекемесіне жұмысқа тұрды. Осы кезден жол құрылысы саласы баурады. Еңбек ете жүріп, жол инженері, заңгер мамандығын оқып алды. Қазір қос дипломы, алған білімі өзіне үлкен көмек. Біліктілікті арттыратын курстардан да қалмайды. Өйткені технология ай сайын жаңарып, жаңғырып отырады.
Жол инженері саламатты өмір салтын берік ұстанады. Спорттың түр-түрінен хабары бар. Жыл сайын орталықтың барлық өңірдегі филиал қызметкерлері арасында түрлі спорттық сайыс ұйымдастырылады. Соның бәріне белсенді қатысып, өңірдегі қосынның қоржынын жүлдеге толтырып жүр. Волейбол, теннис секілді додалар, дойбы секілді тақтадағы тартыста да алдына жан салмайтын қабілеті бар.
Әсел – аяулы жар, келісті келін, асыл ана. Шаңырағына шуақ шашып отырған оның көзінің ағы мен қарасындай болған қос құлыны бар. Отағасы жеке кәсіппен айналысады. Отбасындағылар білікті жол құрылыс инженеріне үлкен қолдау көрсетеді. Жетістіктерімен мақтанады, марқаяды. Білікті инженердің жол саласына сіңіріп жүрген еңбегі ерен.
Қарағанды облысы
