Оңтүстікте бәйшешек гүлдеді

Бәйшешек көгілдір көйлегін киген көктемнің алдын ала елге сүйінші сұрап жіберетін хабаршысы сияқты. Ең алғашқы болып күн көзінен сөгілген көбік қарды тесіп шығатын гүл. Айтуға оңай, биыл Оңтүстікте қыс болмады есебі. Жаңа жылды ел күн жылы, жер қарада қарсы алды. Қар емес, жаңбыр төпелеп тұрған жылдар да болған. Бірақ, ақпанның ортасы аумай жатып бәйшешектің гүлдеуін ел неге жорырын білмей жүр. Оны айтасыз, осы қаңтар, ақпанда да шағын ауламыздағы жасыл баудың қылшығы қисайған жоқ. Жылы қар астында жатты, қазір орып алмасаң, бойымды тіктей алмаймын дегендей, ұзынынан сұлап жатыр. Арқадан келген нағашымыз Кәрібай Шөшіков Қарағандыдағы достарына: «Мен қазір футболкамен далада жүрмін десем, сенбей­сіңдер», деп телефон шал­ған. Қарағандылықтарды қайдам, шымкенттіктер сенеді. Тап қазір қала төңірегінде ойын балалары бәйшешек теріп, асыр салып жүр. «Шымкенттіктер сөйтеді, Шымкентте бәрі болады», дейді біреулер қызбаланғанда. Иә, солай. Жүрегі жылы Шымкент сөйтеді. Бақтияр ТАЙЖАН, «Егемен Қазақстан». Шымкент.