Сурет: krmm.kz
Талдықорғанда Қаратал өзенінің жағалауына 141 қарағай көшеті отырғызылды. Панфилов ауданында 3 мыңнан аса ағаш егілді. Экологиялық мәдениетті қалыптастыруға бағытталған Талдықорғандағы көгалдандыру шарасына мемлекеттік қызметшілер, орман шаруашылығының өкілдері, белсенді тұрғындар, ұзын саны 100 адам қатысып, өзен жағалауының облыстық перинаталдық орталықтан Теннис кортына дейінгі аралығына ағаш екті.
Жалпы, облыс орталығында жыл бойы 12 мың жапырақты және қылқан жапырақты ағаш отырғызу жоспарланған, оның 2 мыңға жуығы көктемде, 10 мыңы күз мезгілінде отырғызылмақ.
«Наурыз мерекесінің басталу құрметіне «Таза Қазақстан» экологиялық бағдарламасы аясында ағаш отырғызу акциясын өткіздік. Бүгін қалада негізінен қарағай көшеттері отырғызылды, өйткені бұл ағаш түрінің экологияға пайдасы өте зор. Талдықорғанда ғана емес, облыстың өзге өңірлерінде де осындай шаралар атқарылып жатыр», дейді Табиғи ресурстар және табиғат пайдалануды реттеу басқармасының басшысы Елдос Мырзабек.
Панфилов ауданы қылқан жапырақты ағаштың 10 түрін екті. Көшеттер мектептер ауласына, скверлерге, көшелердің бойына отырғызылды. Айналасын жас көшеттермен көмкерген білім ошақтарының бірі – Жаркенттегі жаңа мектеп.
«Мектебіміз жаңа, ішіндегі құрал-жабдықтары, кабинеттеріміз – бәрі заманауи. Бүгін міне, айналасына ағаш егіп, көркейтіп жатырмыз. Енді бұл ағаштарды суарып, күтіп-баптауға біз, оқушылар, өзіміз атсалысамыз. Көгалдандыру – экологияны жақсартудың басты белгісі. Сондықтан осындай ағаш егу шараларына жыл сайын белсене қатысатын боламыз», дейді Жаркенттегі «Жайлы мектептің» 10-сынып оқушысы Альбина Қалиева.
Облыс әкімі баспасөз қызметінің мәліметінше, биыл аудан, қала аумақтарында 120 мың көшет (көктемгі кезеңде – 54,2 мың, күзгі кезеңде – 65,8 мың) отырғызу көзделген. Оның ішінде 108 мыңы жалпақ жапырақты, 12 мыңы қылқанжапырақты ағаштар. Аудан, қала әкімдіктері көктемге жоспарлаған ағаш отырғызу жұмыстары бүгіннен басталып отыр.
Айта кетейік, 22 наурыз мерекесіне орай, облыс көлемінде тағы 5 мыңға жуық көшет отырғызылады. Оның 1,7 мыңы қылқанжапырақты, 3,3 мыңы жалпақ жапырақты ағаш көшеттері.
Жетісу облысы
