Ақтөбеде пошта бөлімшелерін жаңарту басталды

АҚТӨБЕ. 10 ақпан. Облыс орталығындағы «Қазпошта» акционерлік қоғамы Ақтөбе филиалының №19 бөлімшесі жаңартылды. Бұл туралы egemen.kz тілшісі хабарлады. Пошта байланыс бөлімшесінің ашылу салтанатына қатысқан «Қазпошта» АҚ басқармасының төрағасы Бағдат Мусин еліміздің жеті қаласында «Қазпоштаның» жаңғыртылған қалалық пошта байланыс бөлімшелері ашылғанын жеткізді. Ол қызметкерлердің жұмыс орнын жақсартумен бірге, мүмкіндігі шектеулі және сәбилерін қоларбамен алып жүретін жас аналардың кіруіне ыңғайлы болуы үшін пандустар орнатылғанын, тұтынушылар үшін кең залға жаңа жұмсақ жиһаздар қойылғанын,  бөлімшелерде бір деңгейлі, яғни кедергісіз қызмет көрсетілетінін атап өтті. Басқарма төрағасының айтуынша, барлық жаңартылған пошта байланыс бөлімшелері тәулік бойы жұмыс істейді, олар бірыңғай электронды кезек жүйесімен, бейне қадағалау және өрт қауіпсіздігімен қамтамасыз етілген. Болашақта мұнда «POST 24» өзіне-өзі қызмет ету бөлмесі ашылып, қаржы қызметі бойынша банкоматтар мен төлем терминалдары, ал пошта қызметтері бойынша абонементтік жәшіктер, постаматтар қойылады. Алдағы уақытта «Қазпоштаның» Ақтөбе қаласындағы қалған 21 бөлімшесі де жаңартылмақ. Сатыбалды Сәуірбай. Дерек: egemen.kz. Сурет: diapazon.kz.