Ақпанның бір күні

Ерейментау ауданындағы «Жаңа Береке» шаруа қожа­лы­ғы­ның құрылғанына екі жылға енді таяғанымен, жаңашыл өнді­рісшілердің аяқ алысы облыс аумағында жақсы қырынан атала бастады. Тәжірибелі маман Ай­гүл Рамазанова әу бастан-ақ жұ­мыстың уақыт талабына сай үй­лес­тірілуін бірінші кезекке шығаруы өз қайтарымын беруде. Мұндағы басты бағыт – мал шаруашылығын асылдандыру болып табылады. Новомарковка ауылының 15 тұрғынын жұмыспен қамтамасыз еткен қожалық бұрынғы мал қо­раларын жөндеумен қатар, қосымша құрылыстар салып, материалдық-техникалық базасын нығайтып отыр. Ау­дандық әкім­діктің қолдауымен 50 гектар жер бөлініп, 3000 ірі қараға ар­налған бордақылау алаңы пай­да­лануға берілді. Жайылымдық жердің ауқымы 1 700 гектарға жетті. Шаруа қожалығы 2013 жылы қалмақтың асыл тұқымды 93 тайыншасын, дондық 5 бұқа мен 5 жылқы сатып алған. Ал, өткен жылы шаруашылықтағы ірі қараның саны 589 басқа жетсе, оның ішінде 326 құнажын, ал 5-еуі өндіруші бұқаларды құраған. Бұған қоса, башқұрт тұқымды 98 бас асыл тұқымды жылқы мен құшым тұқымды 5 айғыр сатып алынды. Бүгінде жылқы үйірі 109 басқа жеткендігі алға қойылған мақсаттың биіктігін айқындайды. Мал шаруашылығын асыл­дандыру бағытындағы респуб­ликалық палатаның құрамына енген ерей­мен­таулық қожалық ауыл өмірін жандандырып, ел игілігін еселей түсетіні анық. Бақберген АМАЛБЕК, «Егемен Қазақстан». Ақмола облысы, Ерейментау ауданы.